Oté

Mové nouvèl pou nout natir : nout koraye lé an mové z’éta

Justin / 28 zwin 2016

Na poin lontan moin la parti in kou koté d’Sin-Lé é konm di lo kont moin la vi la mèr dann brizan a sèk é in pé d’moun té apré marsh dsi lo ban koraye : kisoi pou marshé, kisoi pou trap pti poisson. Sa la pa in bon nouvèl, an kontrèr !

Zot i koné lo koraye, sa in bon n’afèr pou lo nésaz bann kokiy, bann ti poison épi tout sort éspès dé zanimo la mèr k’i fé lo byo-divèrsité é d’apré sak moin la lir konm lo koraye lé dann danzé lo bio-divèrsité li osi lé dann danzé... Poitan mi antan pa d’moun kriyé, protèsté pou ké ni ésèye ar-bate aryèr é songn nout koraye malad.

I fo dir isi souvan-dé foi la natir i kont pou dé prine pa solman pou bann brakonyé, mé galman pou bann sèrvis ofisyèl, é galman pou bann politik. Pou kosa mi di sa ? Nou la bien vi koman la zèr la kriz rokin é mèm in pé la pansé nou té i doi tyé vèr é sèk so bann z’animo lé dan la mèr dopi pli lontan ké nou lé dsi la tèr. Tou lé zour nout bébé lagon latanyé lé maltrété é sa i fé pa arien bann pouvoir piblik… alors étone pa ké tout bann z’ankète i amontr nout koraye lé masakré.

Alors biensir nora touzour mové nouvèl, par dsi mové nouvèl ziska k’in zour i di anou : lo koraye lé fini é sa sar in gran katastrof pou nou avèk lo konsékans ni pé prévoir san tronpé.


Kanalreunion.com