Oté

« Mové parol i fé pli mal ké mové kou ! »

In kozman pou la rout

Justin / 20 zwiyé 2016

Moin lé sir ké nana bonpé d’moun i pans konmsa ! Dizon si ni mète dsi la tab in doulèr lo kor, avèk in doulèr moral suivan lé ka, nana désèrtin moun i préfèr inn é désèrtin moun i préfèr l’ot. Dizon in moun lé pa fyèr, li préfèr in doulèr moral ké li rosan mèm pa tro, mé in moun fyèr li préfèr in doulèr dann kor, pars nana in n’afèr i apèl l’onèr é bin pou désèrtin moun sa i pass avan tout. Pou l’onèr nana in pé té i antien pa gingn in kou d’lépé mortèl. Pou l’onèr na in pé la déklansh la gèr ! Mé konm mi di, pou d’ot kalité d’moun l’onèr lé konm in bout papyé. Azot, shoizi z’ot kan ! Shoizi z’ot valèr ! Ni artrouv pli d’van !


Kanalreunion.com