Oté

« Mové zèrb la poin lo tan pousé dan la tèr labouré ! »

In kozman pou la rout

Justin / 10 zwiyé 2017

JPEG - 43.6 ko

Sans prop ? Nana lontan mi lir kouyonad la, pars sé in kouyonad. Labouré, rotourn la tèr, arrotourné : pou kosa ? Pou tyé tout bann béstyol i travaye pou nou dan la tèr ? Tyé bann vèr d’tèr, bann ti kloport, épi tout bann ti bébète i pèrmète nout tèr bien viv, bien réspiré, bien amen ziska bann rasine bann plant la nouritir k’i fo pou bien grandi, pou bien fléri, é pou bien doné. Anpèsh mové zèrb pousé ! Kouyonus, kouyona, kouyonum. Pou kosa ? Son rasine, lo gran, lo gro konm lo pti épi son mayaz i zoué son rol obli pa sa… Sans figiré ? Lèss lo moun pous konm zèrb fol ? Non sinploman bien aranz la sosyété pou bann z’anfan grandi konm i fo, profite z’ot libèrté, dévlop z’ot résponsabilité, pou komans rézoud zordi bann problèm i mank ar pa d’ète pozé domin. Alé ! Mi lèss azot kass z’ot tète la dsi é ni artrouv domin sipétadyé.