Oté

N’an déplèz a désertin, alerdzordi sé nou !

Justin / 6 out 2015

Té nout tour pou rorganiz la fèt. Trwasyinm fwa pou nou, dopi 1979, dopi lo tan néna lo zé dézil (ousinonsa zé d’kanèt ?). Sak i dové èt in gran fèt pou vréman pou nout tout, po léspor, pou lo bann zatlèt, pou bann péi partisipan. Néna té atann dopi katran, zordi ni dwa rann a nou kont, tousala i tourn an lod’boudin.I sifi kinn-dé rwa gatèr i sanmèl konm diré mon granmèr, pouk tout i dégrinn bout par bout. Tout té dos tank lin a lot té réspèk lin a lot mé dék inn la vouli fé lo mal dind an parmi, pou diminié lot, ala lo résilta.

Sanm pou mwin tousala lé grav pou nou, pou nout lantannt rantronou dan nout zonn domin. Dopi dimansh néna in sèl son d’si lo zé, d’si lorganizasyon, i di “si lé pa la dan sé la mashwar“ néna touzour in bout ki va pa. La i lo zinsidan diplomatik èk nout bann zami komoryin, la i problinm visa pou bann zatlèt malgash, sa sé la résponsabilité bann gatèr déor mé i prétan isi minm néna a rodir. In, inn ti détay, iprétan minm pou manzé, bann zatlèt la di ouv gran la boush. Lo réstoran, néna son lèr i di. Mi parl pa zot lo rèss.

Sépousa, kat zour apré, zordi, dann zournal néna i komant.la prèss i di konm sa “Lo zé, sé in fiasko“, “la fèt i tourn o kao“ néna minn inn la di konm sa “An azisan insi la fran la konport a li konm in léta kolonyalis, konm dann tan lo pli pir moman dé son listwar“. Asir a zot lé pa in lindépandantis la di sa, lé pa nonpli in margonyèr, té pa ékri non pli dan témwanyaz. Lo tan la mèt pou konstri in bon lantant dan nout vwazinaz, in bon rolasyon dirab èk nout bann vwazin. Ki pé fé sa mié ké nou ? Ki pé antrotonir sa mié ké nou ? N’an déplèz a désertin, alèrdzordi, sé nou !


Kanalreunion.com