Oté

Na désid par nou minm !

Justin / 18 avril 2015

Zounal yèr la porté, tout i koz minm zafèr, lo kandida la drwat pou zéléksyon konsèy rézyonal mwa désanm lé koni. Konm si lété in mistèr pou nou. Kisa i koné plis mié son rézyon ké sat i rèt li minm dann son rézyon la minm ? I prétan i falé pou zot domann lavi la ba déor, donkalor inn dé la pran lavyon pou domann misié blan sak lé bon, si lo kandida i konvyin tousala. Poitan sé in zéléksyon pou konsèy rézyonal, pou zèr la rézyon isi. Kisa la di Paris i komann pa nou ? Sanm pou mwin, nou néna in mové tik, domann souplé touzour, domann banna lo plan. Sanm pou mwin lé difisil rofé in pé.

Pétèt sa in nafèr nou néna an nou dopi lontan minm, mé a nou, sé nout mové labitid, i fo touzour téléfonn la ba déor pou pran lèr. Pran in légzanp, in légzanp dann laktialité la minm. Zordi nou néna in problinm èk nout kann, a nou minm va nyabou trouv in solisyon èk nout kann, domann pa la ba déor koman ni sar dépay nout kann, domann pa déor koman ni sar koup nout kann, vik la ba déor banna la zamé vi in lèz ou sinonsa in né d’kann. Pou tout lé konm sa. Néna la vanyi la ba déor ? Néna palmis la ba déor ? Néna gouyav la ba déor ?

Poitan sak fwa ni domann lord la ba déor. Mwin lé sir é sértin, pou zéléksyon banna la gingn la bénédiksyon Paris èk sa zot lé rovni èk lo program. Pétèt mi tronp a mwin, konm si pou mwin pou zéléksyon, pou okip son rézyon, odrémié shakinn son shakinn, sak i plant soriz, okip son soriz, sak i plant mirabèl okip son mirabèl, sak i plant kann okip son kann. Pa tout rézyon minm dogré.A nou ni di pou nou la rènyon, a nou i désid nout dogré. Pou kann, konm pou ot shoz, Paris i pé pa komann a nou. Na désid par nou mnim !


Kanalreunion.com