Oté

Na in zistis kan mèm ! Zot i kroi pa ?

Justin / 6 octob 2009

I fo fé konfyans la zistis son péi ! Sa ankor in kozman an parmi sak i apèl "kozman la boush rouvèr"... Pars, ziska zordi, na poinn loi k’i obliz aou an avoir konfyans dan li... D’apré sak mi kroi !
Si i anil in zéléksyon, pars lo pèrdan la pa gingn roganiz sa konm k’i fo, donk sé par son fote nana in l’érèr, l’èr-la mi oi pa kèl prinsip lo droi la apliké. A moin ké la fé in l’aplikasyon an kass-kassé, kaziman an dégréné ! Si i anil in n’ote, pars i prétan dir la fé in ladi-lafé d’grataz ti-boi, fanafoute, épi lanboulkidi déssi lo pèrdan. L’èr-la mi konpran pa kèl kalité prinsip bann ziz, aryèr-aryèr pti z’anfan Descartes, in bann rasyonalis patanté par l’fète, la apliké.
Pou in léspri sinp, kom moin, lé pli fasil konprann té i falé ardone in shans kat ténor la Droite, épi zok in kou kat politik gouvèrnman i paré i porte pa zot dann son kèr. Lé pli fasil, mé sa i vé pa dir sé toute la vérité, pars la vérité lé dir pou konète épi i mète lo tan pou dékodé... An kontrèr, i prétan mansonz la pate lé kourt, la pa dir pou souk ali. Dé foi, lé in pé dir, mé i nyabou kan mèm !
I nyabou kan mèm ? Byinsir ! Byinsir k’i nyabou ! La prèv ? Bann dalon gouvèrnman dimansh la gingn galo, épi lé z’ot, sak gouvèrnman i vé pa, la gingn lo zéléksyon. Na in zistis kan mèm ! Zot i kroi pa ?


Lésplikasyon inn-dé pti mo :

Kass-kassé : mal fagoté

Dégréné : tor-tor

Rasyonalis patanté : par z’ot métyé, dizon konm in pé i pran patante

Grataz ti-boi : bann sorsyé i grate ti-boi (i di zot i lir dan la sann avèk in pti boi)

Léspri sinp : k’i sar pa rode midi katorzèr.

Souk(é) : trapé san largué (konm bann ramèr i souk la ram kanote)

Gingn galo : kom in kok batay kan l’advèrsèr lé pli for

Dalon : bon kamarad - an dalonaz : an kamarad


Kanalreunion.com