Oté

Na poin in l’obligasyonn pran prékosyon don isi ?

Justin / 14 octob 2015

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité, mi antan azot apré anparl rosh Madégaskar é zot l’apré di si, l’apré di la, konmsi zot lété sir d’zot. Poitan galé sé galé, é lo galé k’i fé vnir isi na poinn sa shé nou… épi la gran bézoin dé li. Touléka, mèm si noré, l’apré mète si tèlmann l’antrak ké ra-d’maré nora lo tan d’arivé épi kass tout sak la fini fé. Pétète sé sa ké zot i vé, san oir ké sar nou mèm sar pri pou pèye anplis apré. In bon kalkil touléka ! Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, i étone ar pa ou si mi di aou moin lé pa dakor avèk ou. Mi koné pou vréman somenn isi i sa fé vnir bèl-bèl kap dopi Madégaskar. Pétète sa i fé pa ou arien d’antann in n’afèr konmsa, pétète in bonpé d’moun i s’anfoutsa, mé moin pèrsonèl mi pans pa konmsa. Pa arienk moin pars moin la antann lo komité pou l’anvironeman li osi li di sa lé tro riské. Par raport lo bann maladi ké nana la-ba é na poin isi konm la pèst, konm la polio, konm la raj. San parlé lo déga k’i fé la-ba dann Madégaskar dsi l’anvironeman… Bien sir lé pa sir ké bann maladi moin la mark an-o la, v’ariv isi, mé i fo pran prékosyon. Akoz ? L’obligasyon pran prékosyon lé valab pou La Frans épi l’Erop é pa pou nou alor ? Lo droi d’isi é lao droi d’ayèr la pal o mèm alor ? Tok ! Pran sa pou ou !


Kanalreunion.com