Oté

Na poin inrègloman pou sa don ? I fodré avan k’i tyé tout ! L’om l’apré tyé l’om, mi di azot !

Justin / 21 zwin 2016

Zot i koné poisson sak i apèl ti-jone ? Sa lé bon, sa na bon gou, pétète in pti pé tro lo zo pointi pou moin-z’arète si zot i vé bien ! Donk, yèr, moin té okipé pou nétoiye ti-jone pou fé in kari : troi, pa plis, pars la poin in réjimann moun la kaz.

Donk mi koup lo bann zèl sak lé riskab pik demoun, mi tir z’ékal avèk in spès tir-zékal moin l’ashté Maurice. Aprésa mi rouv lo vant a komansé parlo pti trou nana dann l’androi son vant lé baloné. Lo pli pti, péna problèm ! Sé in zanfann poissson. Lo dézyèm l’avé par-la vin santimète é kan mi rouv lo vant mi trouv son grap zèf : sa lé rouj, nana sirman plizyèr milyé do zèf la-dan. Mazine in pé kan sa nora éklo, l’avé do koi pou alimant la mèr. Troizyèm ankor pli pir : lo grap zèf lé dé foi pli gro, na dé foi plis do zèf dodan.

Alor, ala lo késtyon mi poz amoin. Mi di na in sézon tang, na in sézon zoizo, dsi la tèr na in sézon pou planté, na in sézon pou grandi é in sézon pou ramasé. Akoz pou poisson la mèr la poin sa ? Poitan la fini étidyé la mèr, i koné kansa poisson i ponn alor pou kosa i défann pa la pèsh in sèrtène sézon ?

Pétète i pans la mèr i vid ar pa zamé ? Pétète i pans konm sa lé sovaz la pa bézoin protèz ali ? In l’érèr, in gro l’érèr ! Si i kontinyé ti-jone osi nora pi dan la mèr. L’om l’apré tyé l’om, mi di azot !


Kanalreunion.com