Oté

Na poin pli pir parl-pa ké sak i vé pa parlé, Pli pir antan-pa-zorèy ké sak i vé pa antann !

Justin / 14 séptanm 2011

Matant Zélida la ékrir Justin :
Mon shèr nové, mon spès salté,
M’a dir a-vou in n’afèr ! Rant tout kandida i port zéléksyon sénatèr, sak nana mon proférans sé Misèl Vèrgoz. Ali mèm mon pli proféré, sak mi priyèr Bondyé pou li gingn son zéléksyon. Poitan, d’apré sak li di, li sé lo sèl vré gosh i prézant zéléksyon, é vi koné, moin la zamé vote pou in gosh. Dépi k’na zéléksyon é ké fanm la gingn lo droi d’votaz, moin la touzour vote pou la droite, mé zordi moin nar pa fé parèy. Pou kosa d’apré vou ?
Dabor inn, so mésyé-la la fé pèrde Paul Vergès épi son l’Alyans. Donk sé li k’la fé gingn mésyé Didier, é mi pans sa i mérite in romèrsiman. Moin la trouv drol ziska ké la pa mète ali lo shèf la list UMP. Té i mérite ali, pou vréman !
In n’ot rézon ? Na poin dë zour, li lé konséyé réjyonal, é nana kèk tan, li fé la politik la droite. Zordi, kan l’Alyans i atak mésyé Didier in pé tro for, sé mésyé Misèl k’i vol o sokour. Sé dir si bann rouj-de-fon i détèst ali, donk in rézon anplis pou moin profèr ali plis ankor.
Lo rézon lo pli prinsipal ? Zot i koné la droite lé riskab pèrde la mazorité dann Sénat, é sa lé zénan pou nou. Antansion, rézilta zéléksyon sar séré, mé la droite la mète son sou-marin, d’isi d’la-ba, in pé partou. Isi, sanm pou moin, sé mésyé Misèl. Donk, kan v’ariv lo bann votaj de loi, bann sou-marin va aport zis lo voi k’i fo pou la droite amène son politik, bien trankilman. Zour-la, mi kroi, mésyé Misèl va rant dan la dans.
Vi voi mon névé, matant i koné réfléshir, èl la pa konm zoizo bélyé, èl la poin lo vèr dan la tète. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Moin la bien pèr ou néna rézon so foi isi. Mi doute pa, mésyé Misèl, son z’idé lé vréman dan la droite. Mèm si li trouv touzour in bon rézon pou son traizon. An plis ké sa, li koz, li koz, é i diré li arèt arpa, konmsi lo roulman son voi i done ali plézir dann son bar d’gozyé. Aprésa, kan i réponn ali, li lé pi la... An atandan, li la fine tranp son biskui boudoir dann vèr likèr l’UMP. Lé konm sa é pa otroman, na poin pli pir parl-pa ké sak i vé pa parlé, épi pli-pir antan-pa-zorèy ké sak i vé pa antann…

Justin


Kanalreunion.com