Oté

Nana konm k’i diré dé poi, dé mézir !

Justin / 2 out 2010

Sak i suiv in pé bann z’afèr an zistis, souvan-défoi, zot i poz késtyon pars, solon zot, i ziz pa bann z’afèr parèy, parèyman. Poitan, d’apré sak moin la aprann lékol, nana in l’artik la Déklarasyon bann droi de l’om k’i di konmsa : « Bann moun i énète épi i rèss lib épi égal dann zot droi » ; Donkalor, toute demoun i doi ète zizé parèy ;
Poitan, i rosanm nana diférans la manyèr la zistis i amènn son bato rant lé z’inn épi lé z’ot. Dann l’afèr Bettencourt, mi sort antann dir lo madam té kontab, la polis la fine intéroz aèl nèf foi… i fé bokou sa ! Pétète pou k’èl i di lo kontrèr sak èl la fine dir... pétète galman pars sak èl té i di lé té pli danzéré pou bann politik la Droite. Toul fason, lo boug i diriz lo lankète i apèl Courroye, é pou in bon pé, li sré konm k’i diré in kouroi transmissyon pou lo pouvoir la Droite. Sa ni koné pa, mé nou va oir o firamézir. In pé i di mèm i fé lo néssésèr pou k’bann politik la Droite i sort la-dan blan konm la nèz.
Dann d’ote z’afèr, la pa pran prékossyon parèy. Pou la késtyonn bann jènn la manyé lé z’arm kont la polis, in sinp témoignaz par in akizatèr k’i di pa son nom, k’i oi mèm pa son figuir, k’i fé mèm pa sèrman lé bon. I paré konm sa zot i gingn ar pa l’annuiman.
L’èr-la ou i pé domandé kossa i ansèrv lartik moin la di an o-la. Pars, konm di lo konte, i rosanm, dann bann z’afèr-la, tout demoun lé pa trété mèm manyèr, é i diré mèm la-dan nana konm k’i diré dé poi, dé mézir.

Justin


Kanalreunion.com