Oté


Nana z’afèr pli séryé k’la vi in travayèr.
Pou bann shakal konmsa !

Justin / 29 zwiyé 2009

Kan ou na poinn travay, la vi lé an bob pou ou. Pou l’moun ou sé in paréssé, ou sé in fin-yan ; pir ksa : ou sé in domi-sitoiyin. Ou mèm, ou i oz pi, rogard aou dann in glass pars ou na la krintiv oir in figuir d’ shyin batu. Alors, ou i promète : n’inport-ékèl travay ou i fé ! Mèm si lo patron lé an kite-ta-bouète ! Mèm si i fo zoué dan la salté !
Danzéré ? Mèm danzéré, ou i kil pa dovan ! Provik ou nana in travay, pou gonf in pé oute pla, pou gingn in pé la konsidérasyon l’moun, kisoi oute famiy, kisoi demoun étranj !

Ala k’ou i trouv travay. Ala k’oute kèr lé si tèlman kontan, ou i diré li lé an kèr d’solèy, konm Fourcade té k’i di.
Mé, sak ou l’avé pa kalkilé, sé tonm dann grif in manazèr an zobok oui ! An toboz, oui ! In mové fon, in san kèr... Toultan déssi oute do, toultan apré sèy dégoute aou sak ou l’apré fé. Si tèlman k’dan oute syèl pèrsonèl, na pi in sèl pti grin blé, riyink gro nyaz noir. Ala éstèr, ou i gingn oute pourkoi, mé la vi na pi d’gou pou ou. Ou i kalkil la korde pou amay dann oute kolé, rasine mapou pou fé l’infizyon pou boir, lo pon Vinh-Sane pou sote o-an-ba. Ou i kraz oute kor dann fon. Non, plito, ou i sa zète out kor dan la mèr an roulo, sansa dann fon ranpar.

Mi san zot i pans mi plézant ; alé oir, mi plézante pa : mi sorte zis aprann dann radyo, in zouvriyé sinkanté-in n’an té i travay Frans-télékom la suisidé, pars té i falé forsé toultan dann travay, pars la manyèr té i amènn demoun té pa korèk, pars toute z’afèr, toultan lété irzan. Pars li té i an pé pi afors té i arsèl ali...
Li la lèss in lète pou li di tousa, é bann gran diréktèr la di k’i fo réflèshi la-dsi. Mé sa i fé dizuite moun la suisidé dann in n’an solman, dann so lantropriz-la ; l’a pa trouv lo tan pou réfléshi pou bann disète promyé ; mi krin i sar pa réflèshi galman pou lo dizuityèm. Pars, pétète, nana bon pé z’afèr pli inportan k’la vi in travayèr !... Pou bann shakal konmsa.

Justin


Kanalreunion.com