Oté

Néna sak i koz é néna sak i fé !

Justin / 26 décembre 2009

Matante Zélida la ékrir Justin :
Mon shèr nové, mon spès salté, la pa bézoin fé gran-gran zétide pou konprann in n’afèr konm mi sava dir aou : kant in moun na poin tro larzan, l’èr-la, li fé pa gro dépans ! Kant nana in n’afèr pou aranzé dann in kaz… si lé pa tro préssé, li préfèr d’atann, é li la byin rézon. Bin alors,a koz konsèy réjyonal, li vé fé plis, alé oir li rokoné li-mèm larzan i an-mank in pé… Lé pa normal, lé pa rézonab, sré mèm in pé rézodyab fèr in n’afèr konmsa. Vi kroi pa, manyèr k’i sava, bann rouj-de-fon va fini par shanj La Rényon an katédral kassé ? Tok pran sa pou toué !

Justin la fé pou répons :
Mon vyé matante k’i koz touzour la boush rouvèr, sak ou i di, lé pa pou étone amoin vi k’ in bann mantèr-manipilatèr, san konprann, i koz koman ou. Kan ou i di larzan lé rar, ou na rézon… donk i fo byin tiliz ali, sé sak la réjyon i fé. Mé, sirtou, i fo pa done koud’pyé dann larzan fine fé konm inn-dé i fé… anparmi lo Didier Robert. Ou i oi déssèrtin bann gran-shantyé la fine garanti larzan pou fé sa, larzan lé fète..l’èr-la i fo fé lo travay. Pars, si i fo larzan pou fé travay… i fo fé travay pou gingn lo larzan… insi d’suite. Oplis va travay, oplis nora larzan, oplis nora larzan, oplis nora travay... Lé konm sa é pa otroman ! Mé lé vré, konm nou, ni di, néna an parmi l’moun, sak i koz épi néna sak i fé. Fransh vérité !

Justin


Kanalreunion.com