Oté

Néna sak i manz lo zwa, néna sak i manz lo zo !

Justin / 4 avril 2015

Zot i koné lo madam ki sant « sa san la banann, la vaniy é tousala »é bin madam la i sant pa solman, souvan dé-fwa èl i dans osi, pou lo kou èl la dans dan nout larzan. In mandoné madam la té prézidant l’IRT, i prétan an so tan la la kart blé té i shof koz pa koman. Ala pa ké la kour dé kont i vyinn ran a nou kont zistoman lo léskandal larzan. Zot i koné kisa i lé lo madam ? sak la di nout lang néna ni gou ni santiman, nout kozé sé in kozé i ral a tèr, donkalor in mové kozé, nout lékritir in lékritir K-K.

Ali minm dopi lontan i donn a nou loson, li minm lé pri la min dan lo panié d’zèf konm i di. Di pa mwin lo prézidan té koné pa, i prétan tou lé dé lé konm sousout èk la mori, tou lé dé i soutyin lin a lot. Lo randi la kour i di « èl té invit domoun a manzé o séna, èl té i pèy èk la kart blé l’IRT ». Konm diré Jacques Brèl « fo dir a ou ké shé sé jan la i koz pa mésié, shé sé jan la i koz pa i kont »

Dot osi la profit tankipé pou bat karé o fré d’la prinsèss é an klas konfor baya. Tousala la kour dé kont i dénons dann son rapor. Lo prézidan l’IRT la komans réponn, mé la kour i rokoné oplis i dépans mwin néna touris. An gro li rokoné osi néna in gaspiyaz larzan. Dopi lo tan zot i profit, dopi lo tan zot i vwayaz, Sésèl a ou, Maurice a ou, Paris a ou, Nice a ou…… Canada osi i di. Konm ganmoun i di « Néna sak i manz lo zwa, néna sak i manz lo zo » !


Kanalreunion.com