Oté

Ni doi kontinyé é ni arèt kan ni va pu ! arienk kan ni va pu !

Témoignages.re / 20 zanvié 2014

Somenn dèrnyèr moin la parti fé in tour dann Sin-Josèf. I ariv pa moin souvan alé fé in tour laba, mé konm moin na in bon kamarad i rès dann landroi-la, lété lokazyon fé in tour dan la vil Sin-Josèf, papa bondyé.- konm luc Donat té i shant. Si moin la parti laba sé pa pou fé la révolisyon, pars zot i koné nana in problèm i anpozione la vi d’moun sirtou kan bann piknikèr i débark an kantité pou profite in pé la fréshèr d’lo.

Nou la parti oir basin dann la rivyèr Langevin, nou la mont Gran galé é nou la vi in kaskad osi bandé ké lo voil la maryé. Nou la pa mont La Krèt, nou la pa parti Lé liane épi d’ot landroi i fé la ronomé la komine, i pé pa alé partou mèm jour. Antasion, mi sava pa dir azot moin nana in solisyon pou konsilyé lintéré bann moun i rès la épi bann piknikèr, sof pétète mète in navète pou bann moun lès zot loto dann parking an ba épi rode in plas o fré dann bor la rivyèr. Lé pa posib ? Bin akoz sa lé posib pou demoun i pran lo kar pou bate in karé lo dimansh ? Sak lé posib pou zot lé posib osi pou in déplasman kourt... Dizon i tir lo paktaj dann la kès loto, i sharj la sout lo kar épi i désann momandoné é lo soir i fé lo shomin dann sans kontrèr. L’imazinasion lé o pouvoir, li lé pa ?

Bon la pa solman sa mi vé dir. Ala sak mi vé dir : moman doné, dsi l’bor la rivyèr ni oi in group jenn. In pé i kui manjé, in pé i fé la mizik… é kèl mizik mon fra ! In pé i zoué pikèr, in pé i zoué kayanm, inn-dé i shant maloya. L’èr-la mi di mon kamarad : "Ou i oi, sa sé nout viktoir ! Nou ké la lité pou tir maloya dann fénoir !". Lo ga i di amoin, li pans osi sé nout viktoir, mé l’moun i rapèl pa... Donk i fo fé rotrouv azot la mémoir. Aprésa ni diskite soz-é-d’ot é li di amoin : "li pans nout zénérasyon la fine fé nout travay é sé sak i vien k’i doi fé zot par lo boulo !"… Bon romark ! Mé si ni san nou lé kapab ranport d’ot viktoir é prépar lo térin pou d’ot viktoir, ni doi kontinyé é ni arèt kan ni va pi. Arienk kan ni va pi !

Justin


Kanalreunion.com