Oté

Ni prèt, mé ni donn pa !

Justin / 13 novanm 2014

Pou konèt ousa ni sava néna i di a zisto rézon fo konèt ousa ni sort. Donkalor kisa ni lé, konbyin d’fwa mwin la antand so kozman la ? Néna ankor kozman pli bandé i tourn si lo minm sizé i di « Fo touzour baz si sad yèr pou konstri zordi é sirtou pou prépar domin ». Sa in ot kozman lé ankor pli daplon. Pou fé in nafèr solid minm, yèr, zordi, domin i dwa tyinbo lin a lot séré, i pé pa fé otroman, si lé pa in dan lot i dir pa. Mé konm di listwar pou fé tousala fo pa gnoré sak la s’pasé yèr. Boudikont fo konèt listwar, kiswa son listwar shakin déza, sa lé pliskinportan bokou, fo konèt listwar son lantouraz, sa osi fo pa gnoré é sirtou fo konèt listwar son péi, va d’swa é la d’si lé plis konpliké k’ni krwa. Pou sa, kisa pou rouv shomin ? Fo kont si nou minm pou aprann, par nou minm, baz pa si dot.

Si listwar la rényon, pou byin fé, soré lékol té dwa aprann a nou dopi tanm p’ti minm nout listwar pétèt an minm tan okip in pé la zéografy osi, lé dé i marsh ansanm toultan ? Ousasa, zamé la aprann a nou, kiswa dan in liv ékri ousinonsa an léktir pou inn ou tout anparmi, zamé, zamé d’la vi, parlé d’sa té défandi. Zordi in takon d’moun i koné pa zot listwar. Tèlman i koné pa, tanzaot i amay. Zis pou di, kan bann la drwat la fé lo rasanbloman pou la kontinité téritorial, dan lo ta d’moun mi antan in i di « nou lé pa plis, nou lé pa mwin réspèkt a nou ». Mon zorèy la prété, mon zié la karkiyé, mwin té krwa pa. Zot i koné zot kisa la di sa « nou lé pa plis, nou lé pa mwin réspèkt a nou » ? Nout kamarad Laurent Vérgès la di sa lasanblé nasional. Ala zordi moun la drwat i ropran son kozman pou zot kont. Tan mié pou nou.

Mé in késtyon i shifonn a mwin. Sak la di sa la, éské li koné ousa i sort so bon kozman la ? Pétèt san konprann, boug la noré pi shant osi « lo shifon rouz » dann in rényon UMP, vik li dwa sirman gnoré listwar son péi. Mi rokoné nou néna tout, mi romark nou néna bokou d’shoz, bokou lidé, bon pé propozisyon ké banna i ropran. Dopi lo tan ni travay dosi, dopi lo tan kamarad i prépar lo plan. Ou va di, zot i rod ousa néna osi mi andiskonvyin pa, ryink nou néna. Vyin a zot, rogard èk lo zié, mi pé pa di ansèrv a zot, sak lé a nou lé a nou, ni prèt mé ni donn pa !


Kanalreunion.com