Oté

Ni sava pa rès la pou lo grin !

Justin / 29 out 2011

Moin la antann in drol mo dann in radyo pèrka. Lo madam i fé son zournal parlé la di konmsa, pars èl la trouv sa : Paul Vergès i sort fé dë konférans dési son « thème fétiche, le réchauffement climatique ». Fétish-la i fé pans amoin in n’afèr in pé konm lo sor. Konm l’avé kékshoz in pé anfoutan dann son manyèr kozé, moin la parti rogard dann diksyonèr kosa "fétish" i vé dir. Moin la trouv in bonpé mo. Moin la trouv amilète — an kréol, in garanti. Moin la trouv ankor gri-gri, talisman port-bonèr, totèm. Myé ankor, moin la lir in définisyon i di konm sa, sa in kékshoz ou i pans li nana konm in pouvoir majigador.

Anparl l’éshofman klimatik konm in n’afèr fétish, moin pèrsonèl, mi trouv sa in pé pa séryé. Pars lé vré, Paul Vergès, an parmi bann z’om la politik, la atir l’atansyon d’moun an promyé dési sa, dési sak i pé apèl osi déranjman dann klima. Lé vré osi, kan li la anparl de sa, bann zournal la droit épi bann télé la mazine li l’avé pèrde léspri... Pou rokonète in pé pli tar sa lété in vré problèm pou l’imanité. L’èr-la, sanm pou moin, sa la pa in késtyonn fetish, mé in késtyon i mérit l’atansyon toulmoun é pa arienk sète dé-troi pèrsone. Pars sa va toush tout demoun dési la tèr, épi lé riskab ménas l’imanité dann son légzistans konm li lé zordi.

Lé domaz, in bonpé résponsab La Rényon, konm in pé partou, lé pa la èk sa. Lé pa sa k’i antan dan zot bann kozman. Lé pa non pli sak i ansèrv dan zot prozé pou l’avnir. Lé rogrétab zot lé plis okipé par in karyèr, in promosyon, in gingn larzan anplis. Zot i viv dann tan yèr, mé zot i viv pa dann tan zordi, é sirman pa dann tan demin pou l’imanité. L’imanité ? Oui, pars sé in problèm i doi okip l’atansyonn moun partou ousa na d’moun i viv, i kalkil, i réflèshi, partou ousa d’moun i pans sak va vni apré nou dési la tèr. Oté lé ga ! Mi pans pa na in pé i kalkil ni sava rès la pou lo grin.

Justin


Kanalreunion.com