Oté

Ni sèr la gob sak i vé roul èk nou !

Justin / 22 octob 2015

Mwin la vi dann télé in moun sindika la rofiz di bonzour lo prézidan dann in Lizinn bato laba sin Nazèr. Lo sindikalis i di pou rézon, la manir son bann dalon sindika lé maltrété in pé partou an frans i konvyin pa li ditou. War la lwa, rant la kaz bann travayèr gran matin siz èr, porsi banna konm volèr, li prétan pa. Aprésa, touzour dann télé laba la kournèv lo prézidan la gingn moukataz èk domoun, inn ti manmzèl la kozé, li komans pèrd pasians, pou lèr li lé konm sèr ann.

Sa i fé rapèl a mwin lo promié avril 2012 laba sin loui dovan in takon d’moun, sak i dové èt nout prézidan in ti pé tan apré, la déklar k’li lé dakor èk nout propozisyion tram-trin. Voui, fodra ni sava vèr lo tram-trin. Dann son kozé, li la di“sé in prozé ké zot la lansé, é sé lo proshin prézidan va mèt an plas“. Zordi ni atann ankor. D’si lotonomi énerzétik osi lé zangazman té for. Pou li, par d’si, sansa a koté lidrolik, ni dwa an priorité mèt lo ronouvlab.

Laba sin loui, li la rokonèt li minm, èk nout program, nout dévlopman lé posib si ni trap la késtyon shomaz par lo bon bout, si ni ranvèrs la kourb. Sanm pou mwin, konm pou laba déor, pou nou osi, lo problinm shomaz sé lo problinm do fon pou nout péi. Dayèr, lo prézidan la di, si li nyabou pa ranvèrs la kourb, kont pi si li. Ek zéléksyon rézyional, lokazyon larivé pou ranvèrs la tab in fwa pou tout, pou in rènyon nouvèl. Ni sèr la gob sak i vé roul èk nou !


Kanalreunion.com