Oté

Ni sondaz, ni dovinèr

Justin / 11 octob 2014

Eské bann domoun la lé vréman séryé pou vréman ? Zédi swar mi rogard télé rényon promièr, lo télé piblik par l’fèt, ou dimwyn i dovré èt, touléka ni pèy pou sa. Fin d’zournal, in madam zournalis sérié mi sipoz i vyin pou fé in lanons. Oilali-oilala, ni sort fé in sondaz ansanm in zournal papié pou konèt kisa i lé lo préférans rényoné si bann boug ou bann fanm politik isi, é la an dirèk i donn a nou lo non in ponyé d’ moun koni, drwat, sosialis, sant, gosh….in pé, mé pa tout. Pou fini i di a nou, si ni vé konèt lo rès é sirtou si ni vé konèt kisa i pé èt lo prézidan la rézion an 2015, ashté lo zournal an késtyon domin, nora tout dodan. Zournal d’sou mon zié, mi lir. Mé tyinbo a zot dobout. Solon zournal la na in i pé èt prézidan èk 25/100, é dé z’ot osi i pé rant dann ron èk 13 é 11/100. Koman i fé ? èk 11/100 osi i pé ? Zordi zot i koné sa déza ? I ésplik tousa dann zournal.

Banna lé dévinèr koué ? I grat ti bwa ? I di pa nou pou koué i vot, kisa lé kandida, si nana prozé, kisa i fé propozisyon, ryin. Kont fé, In afèr mwin la pa byin konpri, ékout a mwin byin : In madam ké zot i mèt an promièr dan lo klasman èk 73/100, ké la gingn in lastik mwa d’mars zéléksyon minisipal èk in misyé ké zot la klass an dérniè èk 19/100. Tousala la éspass sin pol, ti ash la koup gro bwa i di. Lé konpliké lo zafèr baya. Zordi lo madam soré proféré nout tout an promié, mé dikou ni pandré pa li konm prézidan rézyon domin. Otroman di ni mor pou in kari bishik, mé kan nana bishik ni profèr lo rin shounouk. Bana i koné zot, la bat kart sirman. An souvwin a zot, lo mèm télé èk lo mèm zournal lavé di ké lo madam soré éli lwin dovan mwa d’mars, ni koné kosa larivé.la tourn an lo d’boudin. Donkalor la tir kart partou é noré oubli sin pol ?

Sa travay dovinèr i di. A mwyin mi poz a mwyin bonpé késtyon : dabor inn si i pèy dovinèr ? Sirman. Bin si i pèy dovinèr in pé dawar finn zèt in bon pé larzan.konm sa mèm la gingn kou d’zok zéléksyon, la rogard sondaz, la ékout dovinèr. Lé vré, rogard sondaz ousinonsa ékout dovinèr, mèm dogré. Lé dé i vot pa dalon. Ni sondaz, ni dovinèr.


Kanalreunion.com