Oté

Ni vé pa rokomans konm dann tan la gosh pliriyèl I fo arzout èk sa lo plan dévlopman pou nout péi !

Justin / 5 zwin 2012

L’ané 1997, Chirac la disoude l’asanblé nasyonal é li té i atann pa li, son parti la droite la pran inn pil, inkroiyab. Dopi 1997 ziska 2002, sa lété lo tan la gosh pliriyèl avèk Lionel Jospin. Dann tan-la, tout bann parti la gosh la gouvèrn la Frans. Mi pans in pé d’moun la gard in bon souvnir la gosh pliriyèl. Dann tan-la, la fé z’anploi jène, la fé la LOOM, la fé ankor lo trann-sink èr. Tan-la, paré t’il, la fé kat san mil post travay. La fé ankor in bonpé z’afèr pars l’ékonomi té i marsh bien épi lo gouvèrnman té i vé partaz bann rishès rant bann Fransé. Konmsa, lo plis demoun posib la pa arète dsi l’bor shomin. Akoz mi di sa ? Pars i fo, sanm pou moin, rapèl lo tan kan la droite té pa o pouvoir, é kan gouvèrnman l’avé sousi pou rann in pé méyèr la vi d’moun. Moin lé sir na d’moun la fine obli sa é moin la pèr galman lo baratin la droite la fine fé déga dan la tèt demoun é fane lo l’idé k’i vé ké la gosh i partaz bann rishès la poin. Dann tan-la, rishès l’avé é gouvèrnman la partajé.
Mi pans sé an souvnir so tan-la ké nout kamarad Elie Hoarau la di, kan Hollande la prézant son program, sète-la té pa mal ditou. Sa té lo soisant mézir. Aprésa la vni lo trant mézir pou l’Outre-mèr. Zot i koné, nou lété pa kontan san-pour-san bann promyé mézir-la. Sé pou sa nou la domann pou mète La Rényon dann shomin dévlopman avèk tout sak nout bann kandida i sava di partou, dan lé sète sirkonskripsyon. Pars ni vé pa, ankor in foi, lo trin lo dévlopman i pass dovan nout bout né. In kontra pou dévlop lo péi : sé sak té i mank anou l’ané 1997... Ala pou kosa, sanm pou moin, malgré lo bien la gosh pliriyèl la fé dann tan, i fo pa ni rokomans fé parèy zordi. Si moin l’avé in mo d’ord, mi diré : sak i fo anou, sé la gosh pliriyèl + in bon plan dévlopman nout péi.

Justin

NB : Lo soisant mèzir + lo trant mézir pou l’Outre-mèr, sé konm k’i diré la gosh pliriyèl, lo kontra nou la sign avèk Hollande, sé nout plan dévlopman.

Justin


Kanalreunion.com