Oté

Ni vé pi ashté koshon dann gouni !

Justin / 5 mars 2016

Kisa la di ni gingn arpa zamé align lo pri marsandiz isi si lo pri déor ? An souvyin a zot fi-in-tan lo pri lésans té goumant, té goumant, té goumant parl pi koman. Donk té falé trouv in solysyon pou tash mwayin anpèsh tro lo pri goumanté, sinon zis pou déza ariv o mwin topo la frans. Mi anparl lésans parské pou mwin, sé in produi tou lo moun i ansèv, konm léstricité, konm dolo, tousala i dovré èt minm pri partou d’si lo téritwar pou parl konm bann la ot.

Zordi ni wa lésanss, konm gazwal, konm lo gaz tousala i bèss, tamié, ta lèr nou tonm apopré konm déor. Dan lo tan, désértin i dizé lé inposib fé désann lo pri, ziska tan mèt lo pri lésans konm déor, lé inposib fé in nafèr parèy, vik lo transpor lé pa lo minm, nou na pwin lo minm prodiktèr, lo pri lé pa lo minm partou, la taks, oilali, oilala…… Rozman la d’si i gingn pi taz a nou vik lo pri lé koni partou, gran rouvèr, lé afishé partou.

Sominn dérnyèr lo préfé la rann piblik lo bouklié-kalité-pri é pa rapor lané dérnyèr i prétan ni gingn in léro. Pétèt pou byin konprann lo tik-tak é pou la transparans soré intérésan pou nou konpar lo pri lo 107 zartik lo bouklié par rapor lo minm zartik déor, zis pou war la diférans. Aprésa, vyin pa di a nou i gingn arpa align d’si déor, la gingn fé pou lésanss é tous-ki-san-sui. Parské ni vé pi ashté koshon dann gouni !


Kanalreunion.com