Oté

Ni vot pou lo rasanbloman !

Justin / 5 séptanm 2015

Koté mwin na d’moun na filé byin koupé i di konm sa “I plézant pa èk la plézantri“. Ousinonsa i di “arèt fé la fars“. Sa sé pou kass lé kui i di sa. La pou vréman, ni fars pi. I rèt a nou trwa mwa zour pou zour ziska mwa d’désanm, trwa mwa pou tyinbo séryé, pou trouv lo bout èk zéléksyon i vyin. Pous pa lo bato, san sirpriz ni rant dann ron. Konm i di, kandida i mankra pa. Kisa néna in vizyon pou nout péi domin ? Kisa néna in program dévlopman séryé pou la Rényon ? Kisa, kisa ?

An kadmwin, mi pans fo fé in gran rasanbloman pou so zéléksyon la. Ek kisa ? Sanm pou mwin, fo fé lo rasanbloman lo pli larz posib, pou byin antropran konm i fo domin la konstriksyon nout péi. Ni pé pa fé lo rasanbloman èk domoun i gaspyi nout péi, èk domoun kaylouch, i mont lo mir tor, kan i mont lo mir tor, i fo arkasé pou romonté. Na pwin larzan, ni lo tan pou pèrd. Fo fé lo rasanbloman èk sak lé dakor èk nout program, vik nou tousèl nou néna pou triyé, i di touzour odrémié touzour pran zorizinal o lièk fotokopi.

Tout i konpran byin, pa in rasanbloman èk bann véyèr d’kok, ousinonsa èk sak i tié zot papa konm Brutus. Lo rasanbloman pa pou gingn la plass, pa pou fé rant la famyi. Lo rasanbloman pou fé gingn la Rényon. Néna travay pou fé, i tonm byin domoun i atann ryink sa. Ni gonf pa nout jabo, ni di pa ni koné tout, pliské tout. Ni avans èk nout 25 propozisyon, nou néna solisyon. Konm Loran ni di “Nou lé pa plis, nou lé pa mwin, réspèk a nou“. Sépousa konm dopi lontan, zordi ankor ni vot pou lo rasanbloman.


Kanalreunion.com