Oté

Ni vyinpabou di ousinonsa banna i vyinpabou konprann ?

Justin / 31 mars 2015

Ziska dimansh 29 mars domoun isi la rényon konm la ba déor té i wa la vi an roz i prétan. Dopi lindi gran matin, dopi kan nou la lévé lindi ni wa la vi an blé so kou si, mé afol pa orozman lé pa blé marinn. Bann zournalis i aranz la soss konm sa. Dopi lindi matin, an frans in trantinn déparman roz la bléi toudinkou apré zéléksyon, konm i di la ba banna la lèvé lindi matin èk la gèl do bwa. Néna in kantité dmoun la pa voté, zot i san pi a zot konsérné par lo zéléksyon, kèlkéswa lo zéléksyon, inn apré lot domoun i boykot. Néna i krwa pi ditou an la politik.

Di a mwin, poukoué in moun san travay dopi lontan, son zanfan osi lé o shomaz, in mandoné pétèt li la vot Sarkosy par dépitasyon, la bèrn a li, la li pé konprann Sarkosy lé pa nout moun. Aprésa li la vot in kou Hollande dann léspwar awar in laméliorasyon, é bin dopi 2012 li atann touzour. Sanm pou mwin, sé lo travay prinsipal pou domoun, dopi 2012 i di a nou, tanto na war lo bout di tinèl, aprésa la di a nou domin nora in léklèrsi, ni wa pa, aprésa ankor i di a nou la ropriz lé la, ousa i lé ? Donkalor sépousa néna in ti pé dmoun i vot.

Lo ti pé dmoun la parti voté yèr boudikont la vot an poundiak pou la drwat. Konm si la drwat i fé dan lo sosial. Di a mwin kansa la drwat la pri in bon mézir sosial. Kansréti inn, mi wa pa. Parlfèt kisa i vé siprimm lé trantsinkèr ? Kisa i donn lo RMI par shikèt ? La rotrèt, la rotrèt, kisa i vé vé travay domoun ziska swasant dizan… Mi arèt la, néna pou ranpli in liv èk bann mézir la drwat ki atann a nou. Poitan ni ésplik, ni di port antansyon, mandoné mi koné pi si ni vyinpabou di ousinousa banna i vyinpabou konprann ?


Kanalreunion.com