Oté

Nicolas Médéa : In bon légzanp léksélans !

Justin / 6 novanm 2009

Nana in kozman mi ème byin antann dir, sé kan i anparl léksélans pou noute péi, pou nout pèp... Byin sir, ni souète léksélans konm in rézilta pou trapé... pa konm in rézilta nou la fine trapé... pars nou na ankor in bon pé shomin pou fé. Mé konm di lo konte : « shomin Gran-Boi, sa lé lon, ti-pa, ti-pa n’arivé ! ».
Pou moin, sa i doi z’ète valab dan toute séktèr... la formasyon li ! la défans la natir li ! dévlopman dirab li ! la fidélité nout bann z’ansète li ! léspor li ! La mizik, la dans... bou-di-kont, in pé toute sak i mète nout pèp é nout péi an l’èr.
Dan mon do, nana in télé i koz. Mi ékoute pa, mé mi antann ali. In l’invité dan l’émissyon : Nicolas Médéa, in shanpyon di mond hip-hop. Moin lé kontan, moin lé fyèr... Ala in marmay la kour, l’aprann dansé toute kalité dans, épi in zour, avèk dé-troi dalon, la déside fé shanpyona di mond hip-hop. Zot la pass séléksyon Marseille, zot la pass séléksyon Paris, épi zot la gingn la viktoir la-ba dan l’Amérik. In si tèlman bon légzanp pou nout jénèss. In si tèlman bon légzanp léksélans.

Justin


Kanalreunion.com