Oté

Noir sé noir é nou néna l’éspoir !

Justin / 31 zwiyé 2015

Na détroi z’ané, mi souvien konm si lété yèr. Dann tan-la nou té apré amenn in konba kont lo rasis dann in lisé. Nou l’avé dmann demoun sign in pétisyon pou anpèsh in profésèr l’avé fé in zès rasis kontinyé travay dan l’édikasyon nasyonal konmsi do riyin n’été. Donk in soir nou té apré rofé lo mond é nou la désid fé in shart kont lo rasis. Mi souvien in sèl l’artik téi i di : « Na poin plizyèr ras, mé na in sèl ras imène ». Lé bien sa in !

Sa in fraz la travay amoin, ziska nana dé-troi somenn. Moin té apré rogard in télé é moin la antann dé-troi z’afèr la détak mon pansé… Inn : in group dis mil pèrsone, dann tan rokilé vèy pa koman bann « homo sapiens » la parti okip lo mond antyé. Zot té i sort l’Afrik noir. Donk demoun in sèl ras la dispèrs dann lo mond antyé… Dé : dann in kavèrn an Frans l’avé dmoun la fé désin, la kui manjé, la fé la tizane é sa sé lo promyé group demoun, banna i pans, la vni dan La Frans. Banna l’avé lo mèm adn ké bann popilasyon l’afrik noir, donk zot té noir, é zot téi apartien lo mèm ras imène. Troi : talèr-la, moin té apré rogard internet épi bann savan laba dann l’Espagn avèk in l’adn lo zo dmoun trouvé dann in grote la fé in portré robo : lo moun lé brin, mèm noir, son zyé lé blé, é li nana lo mèm varyété l’adn ké bann moun i sort dann l’afrik di nor, épi dann l’Afrik noir...

Ala kosa mi pans de sa : moin lé bien kontan nout promyé z’ansète té bann moun l’afrik noir, é zot lété bann « homo sapiens » é firamézir zot la transformé san ké z’ot ADN i disparète é sa i pèrmète konète z’ot l’orizine. Donk, nout bann z’ansète lété noir é bann rasis sré myé avizé pou zot ké zot i fèrm z’ot také... nou kréol rényoné, nout popilsyon lé ark-an-syèl é ni pé bord in pé nout rasis pou sak lé konmsa. Komansman nout tout té noir, « noir sé noir é nou nana l’éspoir » k’in zour lo rasis i disparèt dsi la tèr.


Kanalreunion.com