Oté

Non lo program Paul Vergès pou la Réjyon la pa vyé-jé ditou !

Justin / 12 mé 2016

Dopi l’ané 2010 Paul Vergès lé pi prézidan La Réjyon é désèrtin i fé konmsi l’avé poin arien dann son program. Zot i fé mèm konmsi li l’avé paf é arien pandan son dé manda é pandan lo tan li lété an parmi bann dirijan La réjyon. Komre si i sifi éfas bann z’ordinatèr pou fér kroir k’in moun la pa fé arien, pou fèr kroir li la pa lès okin tras dsi son parkour.

Dan la somenn moin la antann in bonpé d’moun l’apré anparl l’otonomi énèrzétik pou dir la plipar d’tan lo prozé NRL l’avé kine ali konm lé z’ot prozé l’Alyans. Poitan, si mi tronp pa na dé manyèr gingn plis : soi ou i gingn plis sinploman, soi ou i dépans moins é sa lé vré pou inn pèrsone, in ménaz, sa lé vré osi pou in péi osinonsa in réjyon. L’otonomi énèrzétik sé in moiyin pou dépans moins donk an avoir plis rovni-épi pou produir prop. Mi souvien lo tan téi falé dépans in domi milyar pou ashté bann produi pétrolyé. Koméla sré 0,7 milyar k’i fo dépansé donk l’avé moiyin pou ékonomizé.

Bien antandi, dann mon mil mo mi ékri moin la poin la plas pou anparl tout bann projé Paul Vergès l’avé prévi pou donn l’élan nout l’ékonomi rényonèz. An pliské sa lété pa in bann projé konféti mé in projé bien koéran pou fé viv nout péi lo myé posib. Mi souète solman k’in zour bann z’étidyan osinonsa bann z’anségnan – shèrchèr i pansh azot dsi bann projé l’alyans pou étidyé sa mé galman pou donn in nouvo signal de dépar pou bann projé d’baz pou nout l’ékonomi. Pars lo program l’Alyans améné par Paul Vergès la pa vyé jé ditou.


Kanalreunion.com