Oté

Nora ansèrv de rien ! Sof pétèt ansèrv laboratoir pou bann péi apré tir la lang san rézilta

Justin / 13 juin 2013

Moin la lir in n’afèr la poin tro lontan dsi lostérité dan la Grès. Mi vann azot sa konm moin l’ashté : i paré la Troïka la baz ali dsi in lozisyèl fo pou obliz lo péi pratik lostérité. Lo lozisyèl an késtyon, d’apré sak moin la lir, la obli tienbo kont léfé la diminisyon bann dépans piblik dsi la bone santé lékonomi. Tir dan la dépans piblik in sèrtin kantité milyar épi sa i port pa a konsékans solon lo famé lozisyèl : i fé konm dolo dsi fèy sonz ! Mank de po, sa lé pa vré : kan ou i artir dan la dépans piblik in sèrtin kantité milyar, ou i diminyé la domann é, par l’fèt, ou i mète la prodikdyon, lo komèrs, lo bann sèrvis dann difikilté. Arzout èk sa, mékanikman, ou i goumant lo shomaj épi ou i diminyé larzan i rant konm zinpo épi ou i rogoumant la dète piblik, kansréti par la goumantasyon bann zintéré i fo péyé.

Na in sèrtin mésyé Junker, in lansien prézidan l’Erogroup, la di, la Grès la pran lo bon shomin. A oui ! Sa ou i pé dir mésyé Junker. Si tèlman shomin lé bon, gouvèrnmn grèk la désid lisansyé 2.600 travayèr lodyovizyèl. In n’afèr ki tonm bien vi k’la Troïka la di i fo dégrès la fonksyon piblik... i fo tir ankor dé mil salaryé. Bon pou sa mèm ! Gouvèrnman la désid fèrm bann télévizyon l’Éta zour pou zour. Mardi matin la di, mardi soir la fé. Lo bann zékran lété ki pétiy san zimaz. Bann Grèk lé abityé kou d’Éta konm sa ! Trakas pa ! Nana bann télévizyon privé. Si lo nivo lé pli ba, inkyèt pa, lo gouvèrnman sar moin kritiké... épi va fé bann zé ! épi va fé bann fèyton ! épi va donn zinformasyon dann sans zot i koné.

Par l’fèt, na ankor in bonpé zafèr pou siprimé : Lopital i kout shèr ! Akoz i siprime pa ? Linivèrsité lé tro shèr ? Siprime ali. Larmé, la polis, lo ransègnman, sa lé shèr osi ! Sa i fo pa toushé, kansréti pou mate lopinyon piblik. Pandan éstan-la, lo péi i anfons dan la kriz. Oplis i sava, oplis la kriz i aprofondi. Ziska kan ? Oplis i sava, lo péi i andèt ! Ziska kan ? Ziska k’in zour bann kréansyé i désid mèt l’Éta an fayit. L’èr-la, tout sak lo pèp nora sibi konm sakrifis nora ansèrv de rien... Sof pétèt pou ansèrv laboratoir pou d’ot péi épi d’ot pèp, zot osi l’apré tir la lang san rézilta.

Justin


Kanalreunion.com