Oté

Nora pwin légalité réèl, si na pwin réspé réèl !

Justin / 16 mai 2015

Ala larivé, lé la, lé sho, i vyinn sortir. Zot la sirman antandi parlé, banna la trouv lo mo magik pou taz a nou baya. Lo mo i sort lwin i sort laba dan lé karaib, pa prononsé par ninport do ki, par lo prézidan an pérsonn : ala li la, l’égalité réèl pou nou, mé antansyion légalité réèl solman dan sink an. Zot va di a mwin nou la atann swasant diz an ni pé atann sink an de plis. Sirtou ni koné nou la valèr kozman boug la. Mé lé byin zordi li rokonèt, nou lé pa égal.

Mé poukoué atann sink an mésié lo prézidan ? Dopi lo tan ou lé la, dopi 2012 ou san konm si nou lé plis égo ousinonsa nou lé mwin égo ? Pou ou sé koué légalité réèl ? Pétèt si ni trouv in solisyon pou réaliz bann promès 2012 a sin lui, mèt an plas in tram-trin réèl pou vréman, anon fé lotonomi énérzétik réèl pou vréman, tousala, pétèt la soré in bon komansman pou alé dousman dousman vèr lo légalité réèl ké ou propoz ou minm zordi.

Si sé pou raminn nout to shomaz réèl minm otèr sat déor, ni pran. Si sé pou mèt rényoné résponsab réèl in pé partou dan nout péi kont si nou. Si sé pou pou mèt an plas in bon léstati réèl, pa in léstati pou fé sanblan, ki konvyin byin a nout péi, ni vot. Mé konm zot mwin la antandi bann média osi, kan lo prézidan la vwayaz dann karaib, bann média, radio, télé, zournal tousala, banna la di konm sa lo prézidan lé déza an kanpagn éléktoral. Si sé konm sa, dizon lo légalité réèl i riskab bat do lèl déza. Sanm pou mwin ni pé pa awar légalité réèl si na pwin réspé réèl.


Kanalreunion.com