Oté

Noré dokoi pèrd son latin !

Justin / 16 janvier 2013

Matante Zélida la ékrir Justin :
Mon shèr nové, mon spès salté,
Mi oi pa tro kèl zanr sosiété in pé i vé pou la Frans zordi. Ala k’zot i vé lo mariaj pou tout demoun. Sa i vé dir, bann bononm, si zot i vé, i pé marié rant zot, bann fanm, si i vé, i pé désid marié rant zot. Moin, moin lé shoké ! Pou kosa ? Pars na in l’institision i apèl lo mariaj. Demoun normal i pas par la pou fé in famiy : lo z’onm, lo fanm épi z’anfan. Astèr, konm lé shoz i tourn-la, kèl shari-vari, sharèt shaviré i sava fé ? Moin, pèrsonèl, sak mi antan dir, nana déja lo PACS, é pou l’moun, sa i sifi pou bann omo. Pou koué zot i vé alé rod pli loin ? Astèr zot i vé an avoir z’anfan par inséminasion artifisièl, zot i vé adopté, zot i vé lo dé soidizan paran nana l’otorité parantal... Mon bann dalone, l’égliz lé outré dsa, é mi pans zot na rézon. Tok ! Pran sa pou toi !

Justin la fé pou répons :
Mon vié matant k’i koz touzour la boush rouvèr,
Di amoin in n’afèr : ou lé pa apré konfonn mariaj rolijié avèk mariaj sivil ou la ? Pou koué mi di sa ? Pars shak foi in moun lé kont lo mariaj pou tout, li anparl lo l’institision sakré lo mariaz ; Donk, sanm pou moin, si li lé sakré, li lé rolijié. Si li lé rolijié, sa sé in n’afèr d’rolijion. Na ka rofiz in pé lo mariaj rolijié. Moin pèrsonèl, moin la konèt lo tan si ou té kominis, ou l’avé poin lo droi marié l’égliz. Out z’anfan l’avé poin lo droi batizé non pli ! Mor, ou té i pas pa l’égliz. Dan mon famiy, sa l’ariv pa arienk in kou ! Kroi amoin. Astèr ou i parl lo PACS, mé mi souvien in tan, na tout in bann demoun té kont sa. Zordi, lo mèm moun lé kont lo mariaj, épi zot i di kontant azot èk lo PACS. Ala in késtion mi pé poz bann moun-la : a sipozé k’i mèt dan lo PACS lo mèm konténi ké dan lo mariaj, zot sré dakor èk sa zot ? Mèm konténi, mé dé nom pa parèy... Moin, pèrsonèl, mi pans noré do koi pèrd son latin. Tok ! Pran sa pou ou !

NB : Arzout èk sa matante, si i suiv out kozman tor, si demoun lé pa marié — konm nana plizanplis —, sa i fé pa in famiy alor ! Konm di lo prins di séga : « Alé manz shoka dan la rivièr don ! ».

Justin


Kanalreunion.com