Oté

Nou kominis, nou lé alèz Blèz !

Justin / 26 févrié 2015

A nou kominis zordi nou lé alèz blèz, nou lé byin dobout dan nout savat dé dwa konm i di, é ankor mi antann par isi, par laba i di zot na la rass, o plis i gingn lo kou, o plis i kour pa. Minm si mandoné nou té in pé katya-katya zordi, ni gonf pa jabo, mé dopi dimansh dérnié lé konmsi nou la rofé lo plin lénérzi é nou néna nout nouvo fèy do rout. Kisa lé pli alèz blèz ké nou ? Pou war poz a nou kestyon si léta nout péi, si kèl léstati ni vé pou nout péi ? Néna va fé zorèy coshon i nyaboura pa réponn, la plipar dtan a nou tousèl i lèv lo dwa.

Poz a nou késtyon si somaz ? Lo pli gro trakasman pou nou, pou nout tout mi vé dir é bin sé somaz.150 000 shomèr i prétan. Nou donn la klé pou sa èk nou dé gran sérviss. Tankadir, ni gingn arpa anbosh 150 000 moun mé va rouv shomin pou in pé. Sanm pou mwin, lé pliméyèr travay ké rèt san ryin fé. Kandida i mank pa, kandida intèl, kandida inntèl, a nou lé pa parèy, ni prézant nout prozé, aprésa néna d’moun pou port lo prozé.

Na bo di kanton 10 i rosanm pa kanton 22 ousinonsa kanton 15 na pli gran bozwin, pou nou, tout kanton kanton la rényon. Sépousa nout prozé y konvyin byin vik li lé global, li rogroup tout. Sé pousa osi nou lé alèz blèz. Nou lé alèz blèz an vizavi nou minm, an vizavi nout pèp, an vizavi la rényon. Lé vré pou vréman Sin-Ni i plant pa safran, Lo-Por na pwin pom-dé-tèr, Tanpon i pèsh pa bishik…… Shakinn son éspésialité . Mé malorozman partou la rényon néna somaz. Boudikont sé nout prozé ki fé ké nou lé alèz blèz.


Kanalreunion.com