Oté

Nou lé an doulèr, mé ni rèss ini !

Justin / 17 novembre 2015

Débi d’lané, mwa d’zanvié, égzaktoman lo 11 zanvié apré lo zatanta “Charli ébdo“ nou la di, aprésa i pé pi ariv a nou pli pir, dopi vantrodi ni dwa malorozman rann a nou kont ké lo pir lé dovan nou. 129 mor èk in takon blésé, bann téroris la ankor tié. Koué ni pé fé kont sa ? Sak i éspas laba déor lé grav, dovan sa, a nou osi nou lé konm banna, nou néna la raz, nou lé an doulèr pou zot, byin sir, ni rann omaz bann viktim inosant é nou lé solidèr èk la famyi.

Samdi gran matin, avan alé fann papié pou zéléksyon, in dalon la anons a mwin la nouvèl. Kap-kap la pran a mwin, vik tout domoun, nou néna kiswa in zanfan, kiswa in frèr, in sèr, in famyi dizon la ba déor. Koué ni pé fé pou vréman kont sa ? Zordi mi antann in pé i di konm sa“ya ka fé konm si“ “ya ka fé konm sa“ Lé éspésyalis minm néna doutans. Koman batay èk in moun sintiré èk baton dinamit.

Lé vré, nou néna la raz, lé vré, nou lé an doulèr mé sépapousa ni viv pi, sé pa pousa ni rant dan nout trou, ni sar kashièt. Koman i apèl sak la fé sa. Barbar, asasin… I prétan an parmi bann viktim néna 19 nasyonalité, boudikont tousala la ariv an frans, mé zot la tié lo mond. Yèr a sinn ni lo pèp réyoné la rann omaz o viktim. Nou osi konm banna nou lé an doulèr mé ni rèss ini.


Kanalreunion.com