Oté

Nou lé an vi ; pouatan, nou lé antouré par la mor

Justin / 22 zwiyé 2014

Dépi kektan, mon vi lé antouré par la mor ; lé vré, sa va ariv nout tout mourir in jour, nou poura pa évit sa ; nésans, kroisans, viéiés (po sak i dépas in sertin laj), mor ; nout tout, kréol i di : « nout tout na pas par la ».
Mé parfoi lé in pé brital ; ou lé a demandé, kèl lé méyièr ? Mourir britalman ? Mourir lantman ; tout sé mourir kant minm ; zot la antandi tou lo problém leutanazi ; savoir si din sertin degré d soufrans, koma profon, si i vo pa mié otoriz eutanazié, sétadir done o malad in doz drog létal (mortèl).

Zordi monn ti fi na 11 zan ; él na poin la sans ; kan él la giny 5 kan, son tati (mon sèr-58 tan) atin din kansèr, i tiin fèt sa, kanping létansalé, o lié rant lopital po la shimio ; 3 zour aprè, décé.
Ièr, in kamarad, provizèr rotrété (73 zan), i sar fé in partid boul lentrédé, na la fèt shoka, kriz kardiak, tantativ réanimasyon, désé, alor ké, avan ièr, nou té apré koz si lo droi la rotrèt, bien boir, bien manzé.
Na minm pa in moi, mi té sar fèt lo santenèr inn kouzine, la radio : « on nou pri danonsé le désé de Maximin... » oté, sé mon kamarad, parin mon garson, a moin parin la siinn : la trouv a li mor dan son kaz, 4 zour aprè, kriz kardiak !
Mi parl pa zot lo kamarad lo parti, lo mardi ni domann son nouvèl, bon, la santé lé pa tro for, mé baya, mourir minm pa 48 ér aprè !
Bin, sa i fé bokou.

Koté kamion mon voizin entrepreneur, mi ékout avi désé, la pa anons lo désé mon dalon provizèr-moin la konu a lu Polinézi, li lé marié ék inn Hoarau Rivière du Mat.
Désé, nana oui ; tout laz ; tout landroi ; défoi ou la anvi antann bann nésans... sinon, oua kroir in zour nora pi domoun si la tèr bon dié.

Justin


Kanalreunion.com