Oté

« Nou lé atashé l’androi nout nonbri lé antéré ! »

In kozman pou la rout

Justin / 6 zanvié 2017

Tazantan dann télé, mi rogard in pé bann dokimntèr : éstra mi trouv désèrtin ! Simityèr galé, mi pans pou d’ot ! Plantasyon rakète pou d’ot ankor é moin lé a d’mandé pou kosa lo moun bann l’androi-la lé atashé avèk l’androi zot lé éné. Dé foi, mi di, dann mon kèr, nout tout dsi la tèr ni doi z’ète atashé avèk l’afrik pars sé l’androi-la ké l’om modèrn i sort. Mé i fo kroir mèm nout zène la fine obli sa mé, di pa tro vite kant mèm ! Mé sak mi koné sé oplis lo soir la vi i aprosh, oplis ni vé raprosh anou l’androi nou lé éné… Kan mi di désèrtin moun mi vé mor l’androi mon l’onbriy plé antéré, désèrtin i doi dir, lo boug la tète lé maf. Mé poitan ! Lé konmsa épa otroman !… Eskiz amoin dalon(e) mé kan mi di sa, mi pans nout bann frèr shagosien. Mi konpran zour an zour z’ot doulèr, konm mi konpran la doulèr bann paléstinien. Moin lé a d’mandé ziska kèl profondèr i sava z’ot déshirir. Sak moin lé sir sé ké dé katsou l’Anglétèr i gingn ar pa zamé sikatriz kalité boubou konmsa la !


Kanalreunion.com