Oté

Nou lé kapab fé mirak ! Bin alor, pou koué ni fé pa ?

Témoignages.re / 27 zanvié 2014

Kan bann konplotèr nora fine afayir nout prodiksyon dosik pou la konsomasyon d’moun épi lindistri alimantèr,.. Kan la tanpératir sar fine goumant rant dé épi kat dégré. Kan nivo la mèr sar fine mont troi kat mète an otèr. Kan bann siklone, sansa bann ra-d’maré, bann tourbiyon va forsir vèy pa koman. Kan loraz va pété, kan zéklèr va roul an boul dé fé dsi la tèr, kan kouran léktrik va travèrs la tèr épi bann plantèr va pèrd zot zanimo pti konm gro. Kosa v’arivé ? Kosa va nyabou fé ?

Promyé zafèr mi pans bann fitir zénérasyon va kalkil la bétiz imène zot bann zansète, donk nout bétiz a nou… Zot va roprosh lo bann majorité la pran bann désizyon pars zot la pa vi pli loin ké zot bout né. zot va domann azot pou kosa, la pa pran, kan lété posib lo bann désizyon téi fo prann. Zot va roprosh bann minorité zot féblès pars zot la lèss pran bann désizyon téi fo pa pran. In légzanp ? La rout dan la mèr. Zot va arprosh bann savan, bann gran politik, bann moun téi koné pars zot la mèm pa lèv lo pti doi kan té i fo... In bon manyèr pou artonm dann la pasivité, lo défétis épi lo lésé fèr, lés kasé. O sinonsa, zot va pran zot kouraj dé min pou zot shanj lé shoz... arfé lo mond in n’ot manyèr, arfé nout péi in n’ot fason.

Mé nou bann fitir fantom san zo, landroi nou sar randi koman nou va oir lé shoz. Kosa nou va arprosh anou konm pa. Kèl l’avnir nou va tras pou nout bann désandan dann gran liv do kont l’avnir. Sèl shoz ni pé dir, sèl léskiz ni pé trouvé, nou téi koné pa bien bann ménas téi pèz dsi la tèr, nou té tèlman okipé pou sov lo vyé mond... Par l’fèt kèl l’ané la fé in bon plan pou prépar La Rényon pou in l’avnir danjéré ? Poitan sé isi nana lo prézidan l’ONERC é li la pa arèt prévnir a nou. Dann kèl zéléksyon lo mèr in pé la riské pou fé in plan pou prézèrv sak i pé prézèrvé dann nout natir. Poitan ni koné bann danjé i ménas anou sof ni koné pa bien lo dogré d’danzé. Poitan, nout bann sosyété la zamé gingn pli bon zinformasyon konm zordi é an gran kantté siouplé. Donk, avèk sak ni koné, avèk sak lé kapab fé, avèk sak la syans épi bann téknik i pé pou nou... Nou lé kapab fé mirak ! Bin alor, akoz ni fé pa ?

Justin


Kanalreunion.com