Oté

Nou lé plis ké kapab !

Justin / 13 zwin 2015

Konm tout avan li, li la v’ni, li la vi, mi koné pa si li son tour li la rotoni. Domin na fé lo bilan tousala. Dapré zot, apré sa, domin nora plis lanbosh la rényon ? Ki pé konèt, éspéron, na war. Néna i di lanbosh i dékrèt pa, i anbosh domoun pou produi, pou produi i fo néna i ashté, i fo néna i konsom é pou konsomé fo ashté é la i fo larzan or zordi pou lèr domoun lé oki. Konmsala ni tour an rond. Anon pa krash dann lo bouyon d’brèd, li la aminn 10000 anplwa édé an plis, an souplingn pa nou.

Zournalis i konsidèr ké lin dé moman for de son pasaz sé dan lo sid, a sin zozèf. Sé dan nout sid sovaz ké li la sign la shart an favèr d’lanplwa èk nèf lantropriz. Nèf lantropriz i tonm dakor pou sèy réspékt lo shart. Sé koué lo shart an favèr de lanplwa ? Boudikont sé fé in manièr fé ka sak fwa néna in lanbosh isi, sé fé an sort si néna in ga la kour néna la konpétans ké sé pou li lo lanbosh, minm pou èt shèf sar oblizé, si néna isi, pran par isi minm. In shart pou sa ?

Donkalor sa i vé dir ké ziska zordi sété pa lo ka. Désértin i apèl sa la rézyonalizasyon de lanplwa. Pou lo moman la diskisyon lé èk bann lantropriz. Sanm pou mwin léta li minm li dovré déza aplik a li minm la shart, argard in pé la ba la sékirité sosial, argard in pé bann polisié, lédikasyon nasional, zinpo tousala. Si léta li minm li réspèk lo shart, konbyin lanplwa ni dégaz pou nou ? konbyin ga la kour ni anbosh ? kan mi di ga la kour mi di osi tantinn. Sirtou mi vé pi antann ké nou na pwin la konpétans. Nou lé plis ké kapab !


Kanalreunion.com