Oté

Nou na la mémoir, obli pa !

Justin / 16 mars 2010

A ! Mi sort antann in bon nouvèl ! Prézidan la Frans la di li sava lèv in pé son pyé déssi la késtyonn réform. Mi réspir... moin lé soulazé… lé tan touléka ! Pou in bon nouvel, sé in bon nouvel. Kossa ? zot i kroi pa moin ? Zot i ékoute pa z’informasyon don ? Tro mantèr ? Mi konpran, zot i profèr rogard fèyton… sa lé pli valab pou zot. Poitan, lé byin itil z’informasyon. La prèv, si zot l’avé ékouté, zot nora koni.
Donkalor, Prézidan la Frans la di li sava fé sa avan la fin dé-mil-onz. Kossa ? Dé mil onz ? Zis avan zéléksyon dé mil douz. Konm di mon matant : « Sa lé an shalèr so boug-la ! ». Alor li shof anou, li mète anou dann malizé pandan san-sètan, épi kan i ariv zéléksyon, li di li va done anou in pti répi. Pandan toute in mandatir, nou la péyé, nou la trimé, la fé pèy anou kotizasyon, tan pir ki pé nou la anpèrde nout travay… é kan i ariv lo votaz, ala li fé son pate dé vélour. Ala li pass la min dann nout do ! Ala k’li fé jème konm bann ti marmay déssi lo bra zot momon… apré an avoir pinsé.
A Sarkozy, rèss in pé trankil avèk nou ! Arète fé pran anou blan pou noir, po d’shanm pou pla kouvèr. Nou na la mémoir... Obli pa !

 Justin 


Kanalreunion.com