Oté

Nou na moiyin pou moiyéné, mé nou lé défandi d’fèr

Justin / 23 désanm 2015

Na poin lontan plantèr la manifèsté. Zot la pa grévé, mé zot la fé in mouvman pou amontr zot l’asé avèk sa. Kosa la spasé ? Sak la spasé sé k’avèk l’inportasyon zot i gingn pi vann z’ot prodiksyon : parl pi zognon, l’aye, mé ankor zariko avèk lo shou. Pou kosa ? Pars déor i produi pli bon marshé ké nou, é nou nout prodiksyon i rèst a-tèr.

Bin kann ? Pou l’instan bann plantèr kann, sanm pou moin zot lé pa bien trakasé. Zot lé konm « rèste la ! ». Zot i bouj pa. Poitan ? Ni koné zot lé bien ménasé. Pou koi ? Parsl’ané k’i vien sar lo dèrnyé koup avèk lo kota é lo pri garanti. Aprésa sa lé fini ! Biensir mésyé Holland la vni fé promès bann rényoné – zot i souvien lo tik-tak 38 milyon l’éro k’i fo domann l’érop la pèrmisyon ?- zot i an souvien mé zot i koné ziska zordi gouvèrnman i bouj pa.

Alor ? L’agrikiltir la fini shé nou ? Mi pans la pa fini, mé konm di lo kont nana in kantité niyaz noir dann son syèl. Mé la pa vréman an parl de sa dann la kanpagn réjyonal. Akoz sa ? Pars na poin arien pou fèr ? Mi pans ké non pars avèk nout tèr, la formasyon nout bann plantèr, nout prodiksyon é lo bann transformasyon k’i pé fé, ni diré nou na moiyin pou moiyéné mé nou lé défandi d’fèr.


Kanalreunion.com