Oté

Nou té an avans, astèr nou lé dan la ké !

Justin / 18 janvier 2013

L’il Moris l’apré fé avans son tram-trin : dan dé troi z’ané, sar fini fé. Airbus 380 va poz an promié Moris plito k’La Rénion. Ni koné kosa l’ariv la MCUR. Ni koné lo rotar nout plan pou l’otonomi dan l’énèrzi la fine pran. Oplis lo tan i pas, oplis ni oi la kouyonis désèrtin dirizan la droit, konm la bétiz désèrtin dirizan sosialis la vann zot l’am la droit pou zot pla lantiy i apèl boulvar Nor. Pou moin, zot maladi, sé ké zot i èm pa nout péi, zot na poin in bon l’anbision pou li, zot lé mèm pa patriyot konm Robinet de La Serve lété dan bann z’ané mil ui san trant.

Tou lé zour mi fé so réfléksion-la kan mi suiv in pé bann nouvèl d’ot péi. Pran l’égzanp dan la kultur, konm inn an parmi bann poto lo dévlopman durab. L’aktialité la done anou nouvèl o moin dé désantralizasion. Sak la éspas dann Metz, in vil la Lorraine : la-ba Beau-bourg la désantralizé, épi i éspoz sak konm i di lo "fon Beaubourg", in gran mizé nana dann Pari. Dopi la fé sa, na in kantité vizitèr parl pa zot, épi tout in kartié komèrsial épi rézidansièl la pousé... Na poin lontan, la fé mèm z’afèr dann Lens, in vil lo nor la Frans. La-ba, demoun i pé vnir oir sak ziska isi té blizé alé lo Louv pou rogardé. La mèm fé in l’éspozision lo skiltèr i apèl Rodin avèk in éstati plis ké séléb sèt lo pansèr — demoun i di sa lo pansèr dé Rodin. Mèm siksé ké pou Metz. Mié k’sa, Lens i komans arlèv la tèt dan la kriz par la kultur.

Noré in ta l’égzanp, é in tan, la Réjion l’avé bien konprann in n’afèr konm sa. Kansa ? Kan la fé lo mizé Stella Matutina. Kan la fé galman lo Mizé Volkan... i prétan l’apré rofé ? Dann tan-la, l’avé demoun la droit, konm demoun l’Alians, l’avé mèm in pé sosialis. Bann moun-la té i konpran l’inportans la kultur pou dévlop in péi. Paul Vergès, pou son par, té i vé kontinié lo mouvman avèk la MCUR. Ni koné kosa l’arivé, mé lé difisil bien oir sak nou la anpèrd.

Biensir bann kumular z’indamnité, zot la pa pèrd arien, mé nout jenès, nout péi, nout dévlopman la anpèrd in bonpé. Nou té an avans, astèr nou lé dan la ké, dann nout l’anvironman l’oséan Indien.

NB : Nicole Robinet de La Serve té i di, li na dé patri : la Frans épi Bourbon. Li té i di pa solman, pars li la pran lé z’arm pou défann Bourbon kont bann z’Anglé, é la Frans kont la koalision bann péi l’Europ, l’ané 1815.

Justin


Kanalreunion.com