Oté

Nout dévlopman : L’anvi épi la volonté

Justin / 5 octob 2010

Dann dézyèm moityé diznévyèm syèk, nout lékonomi lété byin faye. Pou li artrouv in nouvo réspirasyon, té i falé fé lo train, té i falé fé lo Por. La mète lo tan, mé l’ané 1882, l’ariv o-bit. Koméla, lé parèy, nout lékonomi épi nout sosyété lé an pane, la bézoin trap son dézyèm soufl. Demoun i oi in pé klèr i romark sa. Mé sak i oi pa pli loin ké lo boute son né, i oi pa.

Lèv in kou !
Nou la bézoin lo raye. Nou la bézoin galman la route. Nou la bézoin lénèrji prop, épi in bonpé z’afèr, inn sanm l’ote. Nou la bézoin fé travay nout tète pou trouv bann solisyon. Poitan, i diré La Rényon i ézite dovan la otèr lo kap pou soté. Konm l’otrush, so gran zoizo l’Afrik di Sid, li bour son tète dann trou d’galé épi li pans lo shassèr i oira pa li. L’èr-la mèm, la mor l’apré ménass ali séryèzman. Koma, sirkilatoir i ménass, nout dévlopman lé an pane, nout bann travayèr i kroupi dann shomaz. Nout l’ékonomi lé dann l’andormisman. Lèv in kou !

Kossa l’arivé rant 1882 épi zordi ?
Rant 1882 épi zordi, kèl diférans, kèl arsanblans ? Sak la nyabou fé dann tan-la i gingn pi fé koméla ? Nou lé pli pov, nou na moins moiyin, sansa i mank anou l’anvi ? L’anvi transform nout péi. L’anvi la modèrnité. Lanvi donn shakinn in bon plas dann la sosyété. L’anvi épi la volonté.

Justin


Kanalreunion.com