Oté

Nout kanar sar noir !

Justin / 28 séptanm 2011

Mi koné pa si désèrtin moun i koz pou kozé, sansa si zot nana in n’afèr pou di vréman. Mi parl pa bann moun ordinèr, sak i èm rakont zistoir défoi pou done azot la valèr zot la poin, défoi pars rès boush také lé in pé dir pou zot. Non ! Mi vé parl bann ga koni... In légzanp ? Na dé-troi zour, in gran pèrsonaz i apèl Roland Dumas té apré koz dann radyo ; li té mèm apré parl lo tan li lété dann Konsèy konstitisyonèl... l’ané 1995, si mi tronp pa. L’èr-la, mi vann azot konm moin l’ashté, mé moin la lir sa dann internet é moin la antann sa dann in radyo la Frans.

Donk, lo zournalist i poz ali késtyon dési lo kont kanpagn mésyé Balladur, késtyonn an avoir in pti l’informasyon dsi lo Karachi-gate. Ala sak lo Roland Dumas i di lo boug : a bien rogardé, li di, nora fali anil lo kont Balladur konm sèt Chirak, solman zot la pans té pa itil pou dékapite la droit. Antansion, lo boug té in dalon Mitterand, é bann sosyalis l’avé in bon l’opinyon dé li. L’èr-la, mi rapèl bann zij dan l’Italie la pa ézite kondane in bonpé dirizan politik épi bord azot définitivman. Donk, lé domaz la pa fé la mèm shoz dan la Frans, épi ni pé di so boug-la la pa fé son dovoir.

Pétète déstin la Frans nora shanjé. Pétète lo déstin l’Erop nora shanjé ; Pétète osi lo Karachi-gate nora pa dévir konm li la déviré. Boudikont, in désizyon, si èl lété bien fondé, nora pi shanj in bonpé lé shoz in drol bonome la gosh, k’i pran z’intéré la droit. In drol prézidan Konsèy konstitisyonèl k’i sousyé plis son bon rolasyon avèk demoun konm li plito ké aplik lo droi. Pou finir, toultan ké nout déstin sar dan la min demoun la ote, nout kanar sar noir.

Justin


Kanalreunion.com