Oté

Nout linivérsité lé pa bon minm ?

Justin / 11 zwiyé 2015

Sèt ané, navé plis de 11000 kandida pou lo bac. Résilta larivé mardi, i prétan néna 80 pou san réisit pou lo kou, apopré 10000 bashlié an plis pou la rényon é lé konm sa tou lé zan dopi in bon koup dotan. La ba déor lo to té in pé pli for, 90 pour san sanm pou mwin. Mi di bravo sak lé an lèr, byin souvan, sé lo rézilta in gro travay diran tout in lané. I prétan sèt ané sé in bon kivé konm i pé i di vik néna de plizanpli mansyon byin èk tré byin. Byin sir ni dwa èt kontan nout bann marmay.

Mé a mwin mi poz a mwin in takon késtyon. Lo BAC pou fé koué zordi ? Néna i sava linivérsité é la déza, promié lané néna o mwin inn si sink i abandonn san konèt poukoué ? Si sé lo nivo bann marmay lé ba ou sinonsa si sé lo linivérsité i réponn pa. Sak ni koné zordi sék nout linivérsité lé klasé préskan an dérnié dan tout linivérsité an frans. Eské réisir o BAC i donn in moun lasirans tou risk ké li pé réisir zétid sipéryèr ? Eské lo zétid linivérsité i donn i konvyin osi ?

Minm kan nou la finn réponn a tousala késtyon, an dérnié i rèt pou sak la réisi tout zot diplom, i rèt lo problinm pou trouv travay aprésa. La rényon néna 170000 shomèr, 30 pour san nout popilasyon i rèt a tèr é tou lé zan néna 10000 i ariv. Tanka pou bann jènn i dovyin plis difisil ankor. Sof lo réspé mwin néna pou sak la gingn lo BAC, konm i sava, mandoné ni pé di pou désertin, Bak-a-lo ousinonsa Bakalo-réa pou vréman, ousinonsa pétèt, konm banna i di“nout linivérsité lé pa bon minm“


Kanalreunion.com