Nout tout lé grèk zordi !

Matant Zélida la ékrir Justin :

Mon shèr nové, mon spès salté rouj-de-fon dovan l’éternité, astèr nou lé grèk ! Astèr nou lé aténien ! Nout tout ! Tout sak la fé konba vinkèr san mète son pyé dann ron. Touléka sé sak mi antan dopi dimansh, pou in maléré zéléksyon bann léstrèm gosh la gagné la-ba dann in péi i apèl La Grèce. Lé vré kan i di la défète na poinn paran, é la viktoir nana bonpé zanfan. Mi arète la, sinploman pou dir sak i kroi lo gran soir l’arivé ké La Grèce la pa bien gro, la pa bien rish, la pa èl va fé rokil tout l’Erop. Alé, kriy viktoir koméla pars domin zot lé bon pou ar anval zot ranvoi. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, sak ou i di la pa pou étone amoin. Zis in n’afèr pou komansé : alor kan in pèp lé imilyé konm bann grèk lé imilyé, zot la poin lo droi vanjé ! La p’asé, mète ankor ! Kontinyé pil ali. Dézyèm z’afèr, si mésyé Holland l’avé rédi lo rin avèk lé z’ot ébin dabor nou n’ar pé été fouti dann malizé koma ! Dézyèmman bann grèk, bann zésopagnol, épi lé z’ot nora pa été dann so trin fou. Pou kosa ? Pou rékonpans bann bank pou an avoir gaspiy nout larzan : lé konmsa é pa otroman, é tanmyé si la mazorité d’moun i majine, zordi, zot lé grèk. Tok ! Pran sa pou ou !