Oté

Nout tout lé métisé ! Nout tout z’anfan lo mond antyé ! Lo rasis bazé dsi la kouyonis absoli !

J.B. / 11 zwin 2016

L’adn kosa i lé ? Mi sa pa dir azot pars moin sré blijé tro kass mon tèt é tro kass sète zot sirtou é la pa sak mi rod kan mi fé mon modékri… Sak ni pé dir sé ké la-dan nana tout lo karaktèr bann vivan.,. Zot i koné anndan la n’ot, nana moityé l’adn nout momon épi moityé l’adn nout papa. Donk lé inposib frodé dsi la késtyonn momon, konm dsi la késtyonn papa. Mé avèk sa, si ni vé bien voiyaz anndan ni pé alé pli loin, bon-pé pli loin.

La i kontant pa konète papa-momon, la i pé romont tout bann zénérasyon nana avan in moun épi oir kèl – o singilyé konm o pliryèl - li apartien dann la shène la ras umène ; sé konmsa k’in gran l’antropriz piblisité la roganiz in zé. La domann katro-vin-sète pèrsone, volontèr si zot i vé voiyaz dann z’ot adn. Zot lété dakor donk la ramas z’ot saliv, mé solman la plipar té sir san-pour-san, avan lo l’analiz z’ot saliv, dsi zot orizine. In z’anglé té sir li lété z’anglé an totalité, in kubin ké li lété kubin, in mamzèl kurde k’èl lété kurd, solman kurd, é lo rès demoun lété parèy sir san-pour-san dsi z’ot kisanilé.

Kan l’analiz la saliv lété fini, sé l’èr ké tout la bann la tonb de o : lo z’anglé té trant pou san z’anglé, li té osi z’alman, li té i apartien galman in kantité group umin. Parèy pou lo kubin kan li la déklar li sé vréman in z’anfan lo mond antyé-mi pans nou osi nou lé parèy ! Lo jenn fiy kurd ké té i èm pa bann turk la romark èl lété turk an parti. Mèm lo bann doktèr la di aèl, an parmi lo 87 pèrsone, èl nana in kouzin : èl téi arvien pa, son kouzin non pli pars zot téi koné pa inn-a-l’ot. Aprésa la distribyé biyé d’aviyon pou désèrtin voiyaz dann bann péi z’ot adn.

Kèl loson ni pé tir avèk in tèst konmsa : dabor ni pé dir l’umanité la bouz in bonpé é dopi lontan, bonpé plis ké nou téi koné, ansuit ni pé dir osi-an atandan d’ot tèst konmsa pou akost avèk la vérité syantifik-ké l’umanité lé métisé é konm i di : nout tout nou sé z’anfan lo mond antyé. Alor lo rasism i ropoz dsi kèl baz ? La baz la kouyonis, sa lé sir !


Kanalreunion.com