Oté

Nout tout lé migran, nou pliské tout !

Justin / 10 séptanm 2015

Domoun té i dor, domoun té i ronf, konm di mon granmèr, té i dor ziska tan solèy té i pèt si zot vant. Néna i di minm té i dor trankil, d’si zot dé zorèy. Toudinkou la fé dézord, la fé révèy a zot konm di la shanson. Aforss tan dormi, zot té i wa pa bann migran. Dopi kinz zour, konm si tout la révèy an minm tan. Dopik nou la vi lo p’ti Siryin trwa zan mor nwayé d’si la plaz. Konm si lavé bozwin sa pou révèy nout konsians, minm la koté nou la minm néna i sibi lo minm sor ?

Kosa ni fé ? Konm désértin i di, sirtou la drwat rans i di konm sa “Si banna i rant an frans sé sirtou pou toush lo RSA èk zalokasyon familial“. Kisa i pé pou vréman krwar, banna i risk, i travèrs lo dézèr ousinonsa i sot la mèr danzéré zis pou toush lo RSA ? Koté sa, kosa ni fé, ni boush lo zié ? Ni tourn lo do ? Ni armèt banna dann bato, pou zèt a la mèr ? La ba an frans pou lo kou, vik sé zot ké lé dirèktoman konsérné, sé zot lé dovan é la ni pé war koman banna lé zénéré èk bann migran.

Dopi kla difiz la foto lo marmay, la popilasyon déor la rant an par. Shakinn son manièr i èd, domoun privé, kominn, zasosiasyon… Bli pa la touzour awar migran. Migran i rod travay, migran i sov la gèr, migran i sibi lo résofman, migran i voyaz pou war, néna osi. Argard byin la Rènyon, koman la konstri la Rényon ? Koman la pèp la Rényon ? Aryink èk bann migran, dopi la komans nout pèploman. Nout tout nou sé désandan migran, kiswa yab, malbar, caf, sinwa, zarab, zorèy. Sanm pou mwin nou lé migran pliské tout ankor !


Kanalreunion.com