Oté

Nouvo prézidan la promète anou lo trin, é li la di, li la pa in moun pou déréspèk son promès !

Justin / 1 zwin 2012

Matante Zélida la ékrir Justin :
Mon shèr nové, mon spès salté, rouj-de-fon dovan létèrnité,
Fransh vérité, mi konpran pa kosa zot nana avèk lo trin. Zot i pans vréman, si i fé lo trin in pé partou, nout problèm sirkilasyon sar fine réglé ? Défoi mi rogard dann télé, épi mi oi takon loto par isi, par laba, i kol dsi la rout san fé in pa an avan. Poitan, nana lo trin é sa i anpèsh pa fé l’anboutéyaz. Zot i parl koma sirkilatoir, é bin, mèm l’androi nana lo trin, demoun lé pa loin tonm dan lo famé koma sirkilatoir. Donkalor, d’apré sak mi kroi, lo trin i sava pa règ tout nout problèm sirkilasyon. Kroir sa, sé mète lo doi dan son zyé. Fé kroir sa, sé tronp demoun apré an avoir tronp azot par zot mèm. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr, si ou té i égzis pa nora di invant aou,
Sak moin lé sir, si ni kontonyé konmsa, nou va konète gro-gro problème san tardé. Mé si ni mète lo raye in pé partou, sak moin lé sir, sé ké lo bann problèm va diminyé : avèk lo trin, i gingn prévoir l’èr i par épi l’èr i ariv. Arzout èk sa, la pa bézoin éstrésé dsi la rout. An pliské sa, ou pé évite gingn la mor dan l’aksidan, pars fransh vérité, na plis l’aksidan dsi la rout ké dsi lo raye.
Matant, partou, koméla, i fé lo trin, sansa lo tram. Pou kosa sé in bon l’idé partou é isi sé in mové l’idé ? Tout fason, mésyé Hollande la di konmsa, pou dézanklav La Rényon, i fo lo trin. Li la arzout, si li promète in n’afèr, li tyinbo son promès. Li déréspèk pa ! Lé ankourajan pou nou in n’afèr konmsa ! Tok ! Pran sa pou ou !

NB : Solman la pa di i défann in moun pran son loto, son moto, son vélo, son patin roulète, bate a pyé si li vé. La dsi, shakinn va gard son libèrté ! Va roganiz konm li vé son déplasman.

 Justin 


Kanalreunion.com