Oté

Nuit et Brouillard !

Justin / 6 zanvié 2015

Dopi tanm ti minm mi ékout Jean Ferrat, mi inm tout son bann shanson, son mizik, lo bann parol, lo tèks, tousala, na pwin ryin pou zété, tout i ral a mwin pou vréman. Néna in ta èk in takon pou ékouté tout lé valab mé dan tout, sak mi profèr lo plis sé « Ma France ». Néna dot lé bandé osi. Anndan la li parl la Franss zénérèz, la Franss i partaz, la Franss du bonèr, sat i akèy byin domoun i mèt pa déor pérsonn, la Franss de la libérté, san frontièr, la Franss solidèr. Konm li di byin, la France dé kolonm, zot i koné zwazo la pé... Boudikont la Franss ouk i fé bon viv èk son bann péisaz, èk tout son listwar révolisyonèr. Poukoué mi anparl a zot la Franss konm sa sa zordi ?

Zordi lé pi konm sa ditou an franss, mi rokoné pi la Franss, sad Férrat i shant, mi rokoné pi la Franss, sad nou la aprann èk Victor Hugo ousinonsa sad lo poèt Eluard èk son kolonm konm i di dann la shanson. Zordi in mèr an Franss, lo mèr Chanplan i apèl Leclerc i rofiz antèr in zanfan dé mwa édmi dan son simtièr, dan son vil paské li lé Roum konm son famy. Mwin la antandi ankor in mèr, sad Angoulinm, li la mèt griyaz si tout ban piblik pou anpèsh bann pov asiz dosi, li vé pi war ni pov, ni SDF dan son vil, in ot mèr sad korbèy ésonn, li débatiz bann plass publik, li déboulonn tout, touzour i avaz lo mor. Poukoué ? Parské lé pa son bor.

Ziska lèrla té réspèk pa tro domoun vivan dan la franss dozordi, ala astèr na pi réspèk pou moun mor, minm inn ti zanfan dé mwa. Konm Ferrat i di, odrémié « la Franss de trantsis a swasan huit shandèl » ké sad Leclerc. Kosa la rivé pou azir konm sa zordi ? Inn la di a mwin « la dig la soté laba ? »Souvan-dé-fwa i di « Listwar i répèt »Souplé rovyin pi d’si, rovyin pi an arièr. Pétèt sé sa la Franss dékonpléksé ? Ki pé konèt ? A voui, in ot shanson Férrat osi mi inm byin « Nuit et Brouillard »


Kanalreunion.com