Oté

Odrémié ansèrv a ou ouminm !

Justin / 9 zanvié 2016

Pou sak navé ankor doutans, konm ki diré, d’si lo konportman bann moun la drwat o pouvwar, sirtou d’si zot rapor èk larzan, pa pou médir, bin si falé donn in prèv, oila zordi. Promié roflèks po zot, gran matin kan i lèv, avan rouv lo zié, avan bross lo dan promié roflèks, sé larzan. Koman fé pou fé gonf zot pla ? Koman fé pou ranpli zot jabo. La prèv an é, minm pa in mwa apré zéléksyon, konm si lé natirèl shé zot, zot i tonm dan lo travèr larzan, fo krwar lé dan zot ladn.

Promié réinyon, ala i koz larzan san réspé. Koman goumant zot lindinmnité ? Koman pèy la kaz lo prézidan è knout larzan ? An minm tan ki domann a nou sèr nout sintir, sirtou dépans pa larzan toratravèr, an minm tan léta i diminié son par pou bann koléktivité, bann kominn lé andété, konsèy départmantal i souplingn, i prétan, an minm tan, la ba la rézyon sé la fèt o vilaz pou shakinn.

Konm néna niaz dan nout sièl pou in takon d’moun, nou noré di pétèt i sar pran déza in mézir pou sak lé fèb, inn ti mézir pou abat traka domoun, inn ti mézir sinbolik dizon, o lièk sa, daborinn i komans par argard pou zot. Kan ni wa, La grann mazorité d’moun, an difikilté pou manzé, an difikilté pou pèy lwayé, pou pèy lasirans loto, lasirans lakaz tousala. In lané i komans an fanfar pou desertin. Konm di lo dikton, pou èt mié servi, odrémié ansèrv a ou ouminm.


Kanalreunion.com