Oté

Odrémié arèt èk zèd, pèy o pri !

Justin / 25 zwiyé 2015

La ba déor la tépératir la goumant inn-dé dogré dopi débi lété. Sèt ané plis ankor i di. Ni wa dann télé, néna désertin zandrwa la tèr i grinn an farinn télman lé sèk, i sifi argard léta la kiltir, kiswa mayi, kiswa blé, kiswa fouraz, pou byin konprann déga la sésrèss. Bann zagrikiltér i ansouplingn shakinn, é sirtou traka i mèt pou faktir, pou zinpo domin. Zot va di“koué lé pli normal vik sé lété“mé sanm pou mwin lo réshofman klimatik lé pou kékshoz andan la, é i di lé pa zordi la vèy pou éstopé. Sépousa fin d’lané bann shèf léta i réini a zot a Pari pou koz la d’si.

Tanpératir la mont in dogré osi èk bann zélvèr. Zélvèr lé an difikilté, dapré zot, i wa pi lo bout i di. Lo pri i konvyin pa, rant lo pri i pèy péyzan, lo pri pou bann zindistrièl é lo pri èk la grann sirfass, néna in dékalaz, bann zélvèr i trouv pa zot kont, néna inn ti ginn la marz, pa sifizan pou fé viv zot famyi i di. Zot la boush shomin, la dévid la salté dovan magazin, la mèt do fé tousala. Lo miniss lagrikiltir èk lo promié miniss la mayé. Ziska lo prézidan la rannt andann.

Pou sèy tinn do fé, pou pa i anflanm partou, lo prézidan la fé inn dé propozisyon é an parmi, li promèt banna in lèd de 600 million. Sanm pou mwin i konvyin pa banna, banna i profèr an awar de kwa viv èk zot rovni, konm zot i di“Ni domann pa d’zèd, ni domann i pèy a nou o pri réminératèr, ni vé travay, pou viv èk nout travay“Lé vré kan i moun i travay, odrémié awar in bon salèr, plito inn ti salèr èk prim, konm pou kann, odrémié awar lo bon pri kann ké kont si zèd léta, souvan-dé-fwa i vyin pa. Fo touzour mazinn domin, pou la rotrèt tousala. Odrémié arèt èk zèd, pèy o pri !


Kanalreunion.com