Oté

Odrémié fanaz zordi ké tangaz domin !

Justin / 4 novanm 2014

San vin mil, ala ankor in shif an kittakatak pou nou. La lé bloké la. San vin mil domoun i koné pa lir, i koné pa ékrir, konm kazimir i di. In pé i koné kansréti inn ti mizi-ing minm, zis pou sinyé, konm di in kamarad, zis pou fé rant a mwin la zol fanm, ou pou fé gingn a mwin la ont, anshèv di i vyinboupa ditou. Minm si i gingn inn ti gin-ginn konmsa, i apèl a zot touzour zilétré. In ? Koman i fé dann biro ? Pou papié, pou tiliz la kart bankèr, pou viv parlfèt ? Poukoué néna ankor tanksa zilétré ? San vin mil voui, pou konparézon, konm si an frans néna nèf milyon. Mon kamarad i di a mwin pou son par ali, li vyinboupa ékri parské li lé éné dann la koloni, li lé éné an mil nèf san karant kat, boudikont dann la koloni pou vréman é pou li, sak lé éné dann la koloni, si i gingn pa ékri li pé konprann vik lavé pwin lékol tanksa, mé sak lé éné dopi vin, trant, karantan, di a mwin ?

Otan di, donkalor nout lékol i kass an pay alorss ? Pétèt mon kamarad na rézon osi. In ? Dann désértin séktèr pétèt nou lé ankor konm dann la koloni é lékol i tonb an parmi ? Alé war ou ! Mé rozman néna osi zordi sak i gingn ékri, pou sak i gingn, mi di fo pa dékilé, fo anvoyé. Shakinn i fé èk son manièr, fé tansyon sirtou, alé pa gaskongn do moun, krétik pa d’moun nonpli, ousinonsa ramass pa mantèr d’si moun. Pousa mi di, sak i gingn ékri, ékri. Pou ékri i pé fé èk in léstilo kiswa in léstilo blé, mi yinm, kiswa in léstilo nwar, mi yinm pa bokou, kiswa osi in léstilo vèr, mi antyin pa, mi yinm osi, mé mon proférans a mwin pou vréman sé mon léstilo rouz, mi trouv i wa mié i ékri mié. Mi san mié mon kor. Banna i vé pa tro i ékri èk léstilo rouz, an souvyin a zot lékol.

Apré shakinn i lir èk son linèt é i ékri èk son léstilo ali. Pa bozwin la pèr, fo fé grouyé. L’èr la mon dé p’ti fy té èk mwin, dann vakans, inn néna sizan, lot néna katran lé dé i ékri plito byin, mon konvnans, in pé pat moush tanzaot, pa tro si la lingn touzour. Mé i ékri é i lir sad lin a lot. Mandoné, rogard pa tro fanaz dan la kaz, mi lèss mwin, in liv la, léstilo laba kréyon lot koté. Kan mi di fanaz, pa in fanaz sansidsou, inn ti fanaz lézé i mèt la propté apré. An mwin minm mi di, odrémié inn ti fanaz zordi kin gro tangaz domin.


Kanalreunion.com