Oté

« Ogard pa zoizo par son plime ! »

In kozman pou la rout

Justin / 10 mars 2016

Ala in bon kozman dsi lo l’aparans é dsi nout konm-k’i-lé pou vréman. Dé-foi kan ou i kontant èk l’aparans i ariv ké ou i tronp aou san pour san. Dé-foi la réalité lé difisil pou bien konète. Tou-lé-ka, moin pèrsonèl mi ziz pa in moun dsi l’aparans mèm si la pèrsone i fé l’èr bien, si èl i koz bien, si èl i donn l’inprésyon an avoir bon z’idé. Parl pi si è li koz an anroulan la lang !

Mi ziz pa non pli tout suit pou toutsuit in moun i shèrch pa a donn dé li in bon l’aparans, si son promyé traka sé pa d’fé oir ali. Dé-foi sé avèk lo tan ké oui oi kèl sé mayi, kèl sé zèrb de fe. Dé-foi sé dann tangaz k’i pé ziz in moun pa dann bo-tan. Mi méfyé bann flatèr, bann sédiktèr… Pars, konm di lo kont, nana d’moun la gingn fé pran amoin po d’shanm pou pla kouvèr, makaroni pou la bouji é sa sé in n’afèr i bote pa moin ditou.

Pou z’ot par, fé konm zot i vé, shakinnn nana son fason pou gide ali dan la vi. Ni rotrouv ! Nou la pa fashé ?


Kanalreunion.com