Oté

Oir in pé pli loin ké lo boute out né !

Justin / 12 avril 2010

A fors di in n’afèr, ou nana l’inprésyon demoun i koné sak ou i di. Pli pir, dé foi, ou i pans toulmoun nana mèm l’opignon ké ou… Kan mi lir dann nout zournal, i di konm de koi, dévlopman in péi i baz déssi kate poto prinsipal : lékonomi, lo sosyal, la défans l’anvironeman épi la kiltir k’i konpran galman la formasyon. I baz ossi déssi konsékans inn nana déssi l’ote, ou byin rantre zot... Moin lé sir, in pé dmoun kisoi byin fondé, kisoi malfondé, i pans dann zot kèr : bon ! Mé sa i ranpli pa lo vante ! Sa i ranpli pa lo boujaron, par l’fète…
Poitan ? Poitan lé vré pou vréman !
Agarde nout bon projé, la MCUR, sa sé in projé kiltirèl... la poin pou di non ! Solman, li lé bon pou lékonomi galman vi k’li sa fé travay lantropriz, vi k’li va dévlop tourism épi d’ote shoz ankor. Li lé bon pou lo sosyal, pars va donn kréol travay, é va diminyé in pé lo shomaj. Lé bon ankor pou l’anvironeman, pars va romète in pé l’androi an éta, fé pous bann pyé d’zarb la fine disparète, é dévlop la byo-divèrsité… A byin voir, nana in bon pé projé lé konm sa La Rényon : la route tamarin, lo tram-train, lo bann lisé HQE...
Sa lé pa difisil pou oir, la pa difisil pou konprann, provik ou i fé travay out tète… Ké ou i koné oir in pé pli loin ké lo boute out né.

Justin


Kanalreunion.com